स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा:लाडक्या बाप्पाच्या आगमनाची असलेली साऱ्यांचीच आतुरता आज संपली असून, देऊळगाव राजा शहरात आज गणरायाचे अत्यंत उत्साहात आणि भक्तिमय वातावरणात आगमन झाले. ‘गणपती बाप्पा मोरया, मंगलमूर्ती मोरया’ अशा जयघोषाने आणि ढोल-ताशांच्या गजराने संपूर्ण शहर दुमदुमून गेले होते.
चौकाचौकात बाप्पा विराजमान
दरवर्षीप्रमाणे याही वर्षी देऊळगाव राजा शहरातील चौकाचौकांमध्ये सार्वजनिक गणेशोत्सव मंडळांनी आणि घरगुती गणेशभक्तांनी बाप्पाची मनोभावे स्थापना केली. श्री बालाजी महाराजांच्या या पवित्र पुण्यनगरीमध्ये दरवर्षी अत्यंत थाटामाटात आणि शिस्तीत गणरायाचे आगमन होत असते, हीच परंपरा यावर्षीही कायम पाहायला मिळाली.
फटाक्यांची आतिषबाजी आणि गुलालाची उधळण
बाप्पाला आणण्यासाठी सकाळपासूनच भाविकांमध्ये प्रचंड उत्साह दिसून येत होता. मुख्य बाजारपेठ आणि रस्त्यांवर मूर्ती नेण्यासाठी भक्तांची मोठी गर्दी झाली होती. दुपारनंतर शहरात विविध मंडळांनी मिरवणुका काढल्या. ढोल-ताशांच्या कडकडाटात, फटाक्यांची भव्य आतिषबाजी करत आणि गुलालाची उधळण करत बाप्पाचे स्वागत करण्यात आले. अबालवृद्धांसह महिला आणि तरुणाई या उत्साहात मोठ्या संख्येने सहभागी झाली होती. आरती आणि मोदकांच्या नैवेद्याने आज शहरातील वातावरण पूर्णपणे गणेशमय झाले आहे.
