तालुकास्तरीय खो-खो स्पर्धेत ऐनपूर विद्यालयाची दमदार कामगिरी!

१४ वर्षे वयोगटात विजेतेपद, तर १९ वर्षे वयोगटात उपविजेतेपद; तालुक्यातील २० संघांचा सहभाग

स्टार भारत लाईव्ह एक्सप्रेस
आवाज न्यायाचा
रावेर ता. प्रतिनिधी – विकास आमोदकर

ऐनपूर, दि. १ ऑक्टोबर २०२६ :
ऐनपूर येथील सरदार वल्लभभाई पटेल विद्यालय व ज्युनिअर कॉलेजच्या मैदानावर गुरुवार, दि. १ ऑक्टोबर रोजी शालेय तालुकास्तरीय मुलांच्या खो-खो स्पर्धेचे उत्साहपूर्ण वातावरणात आयोजन करण्यात आले. रावेर तालुक्यातील विविध शाळांमधील तब्बल २० संघांनी या स्पर्धेत सहभाग नोंदविला. यामध्ये १४ वर्षे वयोगटातील ८, १७ वर्षे वयोगटातील ८ आणि १९ वर्षे वयोगटातील ४ संघांचा समावेश होता.

या स्पर्धेत १४ वर्षे वयोगटात सरदार वल्लभभाई पटेल विद्यालय, ऐनपूरच्या संघाने दमदार खेळाचे प्रदर्शन करत विजेतेपद पटकावले. रावेर येथील आदित्य इंग्लिश मीडियम स्कूलचा संघ उपविजेता ठरला.

१७ वर्षे वयोगटात उदळी येथील एन. जी. पाटील विद्यालयाने विजेतेपद मिळविले, तर स्वामी इंग्लिश मीडियम स्कूलच्या संघाने उपविजेतेपद पटकावले.

१९ वर्षे वयोगटात सरदार जी. जी. हायस्कूल, रावेरच्या संघाने विजेतेपद मिळविले, तर सरदार वल्लभभाई पटेल विद्यालय, ऐनपूरचा संघ उपविजेता ठरला.

दिमाखदार उद्घाटन सोहळा

स्पर्धेचा उद्घाटन समारंभ सकाळी उत्साहपूर्ण वातावरणात पार पडला. संस्थेचे अध्यक्ष श्री. भागवत पाटील यांनी कार्यक्रमाचे अध्यक्षस्थान भूषविले. प्रमुख पाहुणे म्हणून केंद्रप्रमुख श्री. भूषण पाटील, विशेष शिक्षक श्री. मयूर महाजन, तालुका क्रीडा समन्वयक श्री. युवराज माळी यांच्यासह ऐनपूर परिसर शिक्षण प्रसारक मंडळाचे चेअरमन श्री. श्रीराम पाटील, उपाध्यक्ष श्री. रामदास महाजन, सचिव श्री. संजय पाटील व सर्व सन्माननीय संचालक उपस्थित होते.

यावेळी सहभागी संघांनी शिस्तबद्ध पद्धतीने मानवंदना दिली. मान्यवरांच्या हस्ते स्पर्धेचे उद्घाटन करण्यात आले. उपस्थित मान्यवरांनी विद्यार्थ्यांना खेळाचे महत्त्व सांगत सर्व खेळाडूंना शुभेच्छा दिल्या. तसेच खेळाडू, क्रीडा शिक्षक व प्रशिक्षक यांच्या मेहनतीचे कौतुक केले.

कार्यक्रमाचे प्रास्ताविक मुख्याध्यापक श्री. पी. आर. महाजन यांनी केले. सूत्रसंचालन कोमल पाटील मॅडम यांनी केले, तर आभार प्रदर्शन क्रीडा समिती प्रमुख श्री. एस. एन. महाजन सर यांनी केले.

विजेत्या संघांचा गौरव

पारितोषिक वितरण समारंभाच्या अध्यक्षस्थानी ऐनपूर परिसर शिक्षण प्रसारक मंडळाचे संचालक श्री. प्रविण महाजन होते. यावेळी श्री. आर. एस. पाटील, मुख्याध्यापक श्री. पी. आर. महाजन, उपमुख्याध्यापक श्री. जी. आर. महाजन, पर्यवेक्षिका आर. आर. इंगळे मॅडम, प्रा. जी. यू. कंखरे सर, जे. डी. महंत सर आदी उपस्थित होते.

मान्यवरांच्या हस्ते विजेते व उपविजेते संघांना ट्रॉफी प्रदान करून गौरविण्यात आले. तसेच सर्व खेळाडूंना पुढील क्रीडा वाटचालीसाठी शुभेच्छा देण्यात आल्या.

पारितोषिक वितरण सोहळ्यास ऐनपूर परिसर शिक्षण प्रसारक मंडळाचे सर्व संचालक, तालुका क्रीडा समन्वयक श्री. युवराज माळी, रावेर तालुक्यातील क्रीडा समिती सदस्य तसेच विविध शाळांचे क्रीडा शिक्षक व प्रशिक्षक मोठ्या संख्येने उपस्थित होते.

नियोजनबद्ध आयोजनामुळे स्पर्धा यशस्वी

स्पर्धेच्या यशस्वी आयोजनासाठी ऐनपूर विद्यालयातील क्रीडा समिती, सर्व शिक्षक-शिक्षिका, शिक्षकेतर कर्मचारी आणि विद्यार्थ्यांनी परिश्रम घेतले. त्यांच्या नियोजनबद्ध कार्यामुळे संपूर्ण स्पर्धा उत्साहपूर्ण, शिस्तबद्ध आणि खेळीमेळीच्या वातावरणात यशस्वीरीत्या पार पडली.

१४ वर्षे वयोगटातील विजेतेपद आणि १९ वर्षे वयोगटातील उपविजेतेपदामुळे सरदार वल्लभभाई पटेल विद्यालयाच्या क्रीडा क्षेत्रातील उल्लेखनीय कामगिरीत आणखी एक मानाचा तुरा रोवला गेला आहे.