ग्रीन यात्रा ट्रस्ट द्वारे पर्यावरण जनजागृती सत्र: हवामान बदल व प्लास्टिकच्या धोक्यांविषयी विद्यार्थ्यांमध्ये जागरूकता

ठाणे/ सचिन शेलवले

मुंबई स्थित ग्रीन यात्रा ट्रस्टतर्फे जि प. शाळा चेंदवली, मेघवालापाडा आणि काकडपाडा जिल्हा परिषद शाळांच्या विद्यार्थ्यांसाठी पर्यावरण जनजागृती वाढविण्याच्या उद्देशाने दोन सत्रांचे आयोजन करण्यात आले. या सत्रांमध्ये सुमारे ११० विद्यार्थी आणि ४ शिक्षक सहभागी झाले.

या सत्रांचे संचालन ग्रीन यात्रा ट्रस्टच्या काजल गांगण यांनी केले, ज्यामध्ये ग्रीन यात्रा व्यवस्थापनाच्या मुख्य सदस्य निधी त्रिपाठी आणि प्रशांत आगले यांची उपस्थिती होती. सत्रामध्ये विद्यार्थ्यांना हवामान बदल आणि त्याचा आपल्या दैनंदिन जीवनावर होणारा परिणाम याबद्दल माहिती देण्यात आली. तसेच, त्यांना एकल वापराच्या प्लास्टिकच्या धोक्यांविषयी जागरूक करण्यात आले, ज्यामध्ये माइक्रोप्लास्टिक आपल्या अन्न आणि पाण्यातून शरीरात जाऊ शकते आणि त्याचा आरोग्यावर गंभीर परिणाम होऊ शकतो, हे समजावून सांगितले. सत्रादरम्यान विद्यार्थ्यांचा उत्साह पाहण्यासारखा होता. त्यांनी या माहितीला समजून घेतले आणि पर्यावरण संरक्षणासाठी आपली आवड व्यक्त केली.

सत्राच्या शेवटी ग्रीन यात्रा ट्रस्टतर्फे विद्यार्थ्यांना शाश्वत किट देण्यात आल्या, ज्यामध्ये स्टीलची बाटली, स्टीलचा डब्बा, बांबूचा टूथब्रश आणि रोप लागवडीसाठी उपयुक्त पेन्सिल यांचा समावेश होता. कपड्यांच्या पिशव्यांचा वापर वाढविण्याच्या उद्देशाने विद्यार्थ्यांना कपड्याच्या पिशव्याही देण्यात आल्या. शाळेच्या शिक्षकांनीही या सत्रात सहकार्य केले आणि ही काळाची गरज आहे असे सांगितले. विद्यार्थ्यांमध्ये अशा प्रकारे जागरूकता निर्माण करणे अत्यंत आवश्यक असल्याचे त्यांनी नमूद केले. याशिवाय, विद्यार्थ्यांना कचरा व्यवस्थापन व ओला-सुका कचरा वेगळा ठेवण्याचे महत्त्व याबद्दलही माहिती देण्यात आली.

ग्रीन यात्रा ट्रस्टने आयोजित केलेल्या अशा प्रकारच्या सत्रांमुळे विद्यार्थ्यांमध्ये पर्यावरणाबद्दल केवळ संवेदनशीलता वाढत नाही, तर ही स्वच्छ आणि टिकाऊ पर्यावरणाच्या दिशेने महत्त्वाची पायरी आहे.यावेळी ग्रीन यात्रा फाउंडेशन सहकारी उपस्थित होते