रेणुका नगरमध्ये निकृष्ट गटारकामाचा प्रकार उघड; साचलेल्या पाण्यामुळे आरोग्याचा गंभीर प्रश्न
मुक्ताईनगर (प्रतिनिधी) – शहरातील रेणुका नगर परिसरात नुकतेच पूर्ण करण्यात आलेले गटार बांधकाम निकृष्ट दर्जाचे झाल्याचा गंभीर आरोप स्थानिक नागरिकांकडून करण्यात येत आहे. नव्याने बांधण्यात आलेल्या गटारीवरील सिमेंटच्या धापा (स्लॅब) काही दिवसांतच तुटल्याने कामाच्या गुणवत्तेबाबत प्रश्नचिन्ह उपस्थित झाले आहे. संबंधित ठेकेदाराला ते पुन्हा दुरुस्त करून ‘डबल’ करावे लागल्याने कामातील त्रुटी स्पष्ट झाल्याचे नागरिकांचे म्हणणे आहे.
नागरिकांच्या माहितीनुसार, गटारीला आवश्यक तो ढाळ (स्लोप) देण्यात आलेला नाही. परिणामी सांडपाणी एका ठिकाणी साचून राहत असून संपूर्ण परिसरात अस्वच्छतेचे वातावरण निर्माण झाले आहे. साचलेल्या पाण्यामुळे डासांचा प्रादुर्भाव झपाट्याने वाढला असून मलेरिया, डेंगूसारख्या साथीच्या आजारांचा धोका निर्माण झाला आहे. विशेषतः लहान मुले, ज्येष्ठ नागरिक आणि महिलांच्या आरोग्याबाबत पालकांमध्ये चिंतेचे वातावरण आहे.
सदर कामावर संबंधित विभागाची प्रभावी देखरेख न झाल्याचा आरोपही रहिवाशांकडून करण्यात येत आहे. गटारीत साचलेले पाणी व दुर्गंधीमुळे नागरिकांना दैनंदिन हालअपेष्टा सहन कराव्या लागत आहेत. काही ठिकाणी स्लॅब तुटल्याने अपघाताची शक्यता निर्माण झाली असून नागरिकांच्या सुरक्षेचाही प्रश्न ऐरणीवर आला आहे.
स्थानिकांनी प्रशासनाने तात्काळ पाहणी करून निकृष्ट कामाची चौकशी करावी, जबाबदारांवर कठोर कारवाई करावी आणि गटारीचे काम दर्जेदार पद्धतीने पूर्ण करावे, अशी मागणी केली आहे. तसेच योग्य ढाळ देऊन पाणी वाहून जाण्याची कायमस्वरूपी व्यवस्था करावी, परिसरात फॉगिंग करून डास नियंत्रण उपाययोजना राबवाव्यात आणि विशेष स्वच्छता मोहीम हाती घ्यावी, अशीही मागणी होत आहे.
रेणुका नगरमधील या प्रकारामुळे नागरिकांमध्ये भीतीचे वातावरण निर्माण झाले असून प्रशासनाने तातडीने लक्ष देणे आवश्यक असल्याची भावना व्यक्त होत आहे.
