कल्याण मध्ये घर जप्तीच्या कारवाईमुळे आत्महत्येचा प्रयत्न. स्टार भारत लाईव्ह एक्सप्रेस ठाणे जिल्हा प्रतिनिधी प्रफुल्ल पहूरकर येथील पश्चिम भागातील रामबाग चिकणघर मध्ये राहत असलेल्या एका रहिवाशाने एका वित्तीय संस्थेकडून तीन वर्षापूर्वी १५ लाखाचे घरासाठी कर्ज घेतले होते. या कर्जदाराने कर्जाची वेळेत परतफेड केली नाही. कर्जाची रक्कम वाढत जाऊन १७ लाख ५८ हजार झाली. वित्तीय संस्थेने महसुल विभागाच्या माध्यमातून त्याच्या घरावर जप्तीची कारवाई सुरू केली. पण,त्याने घरात विषारी द्रव्य पिऊन आत्महत्या करण्याचा प्रयत्न केला. या रहिवाशावर कल्याण डोंबिवली पालिकेच्या रुक्मिणीबाई रुग्णालयात उपचार सुरू आहेत. जप्तीची कारवाईसाठी गेलेले पथक घरात असताना या रहिवाशाने घराच्या शय्या खोलीत जाऊन विषारी द्रव्य प्राशन केले. जप्ती पथकाने आपल्या वाहनातून तातडीने रहिवाशाला रुग्णालयात दाखल केले. याप्रकरणी त्याच्याविरुध्द महात्मा फुले पोलीस ठाण्यात महसूल विभागाचे चिकणघर भागाचे तलाठी प्रशांत चौगुले यांनी तक्रार दिली. त्यानुसार पोलिसांनी श्याम सांगवे यांच्याविरुध्द गुन्हा दाखल केला आहे.
