१५ हजार रुपयांच्या अनुदानावरून राष्ट्रवादी काँग्रेस शरदचंद्र पवार पक्षाचे तहसीलदारांना निषेध निवेदन
स्टार भारत लाईव्ह एक्सप्रेस
प्रतिनिधी – शंकर शिवरकर
सिंदखेड राजा : अनियमित पाऊस, अतिवृष्टी आणि प्रतिकूल हवामानामुळे नुकसान झालेल्या शेतकऱ्यांना दिली जाणारी आर्थिक मदत अपुरी असल्याचा आरोप करत, शेतकऱ्यांना नुकसानीच्या प्रमाणात भरीव आर्थिक सहाय्य देण्यात यावे, अशी मागणी राष्ट्रवादी काँग्रेस पक्ष-शरदचंद्र पवार यांच्या राष्ट्रवादी युवक काँग्रेसचे प्रदेश उपाध्यक्ष तथा अकोला जिल्हा प्रभारी अॅड. योगेश नाईक यांनी केली आहे. यासंदर्भात त्यांनी १४ ऑक्टोबर रोजी सिंदखेड राजा येथील तहसीलदारांना निषेध निवेदन सादर केले.
निवेदनात म्हटले आहे की, वाढत्या महागाईमुळे बियाणे, खते, कीटकनाशके, मशागत, पेरणी, फवारणी, मजुरी आणि पीक काढणीचा खर्च मोठ्या प्रमाणात वाढला आहे. त्यातच नैसर्गिक संकटांमुळे पिकांचे नुकसान झाल्याने शेतकरी आर्थिक अडचणीत सापडला आहे. अनेक शेतकऱ्यांवर कर्जाचा बोजा असून, अशा परिस्थितीत मिळणारी आर्थिक मदत प्रत्यक्ष नुकसानीच्या तुलनेत अपुरी ठरत असल्याचे त्यांनी नमूद केले.
शेतकऱ्यांनी एका हंगामासाठी मोठ्या प्रमाणात खर्च केलेला असतो. मात्र, पिकांचे नुकसान झाल्यानंतर मिळणाऱ्या मदतीतून शेतीचा खर्च, कर्जाची परतफेड आणि कुटुंबाचा उदरनिर्वाह करणे कठीण होते. त्यामुळे शासनाने शेतकऱ्यांच्या परिस्थितीचा गांभीर्याने विचार करून मदतीच्या निकषांचा पुनर्विचार करावा, अशी भूमिका निवेदनातून मांडण्यात आली आहे.
पीकनुकसानीच्या प्रमाणानुसार पुरेशी आर्थिक मदत जाहीर करून ती तातडीने वितरित करावी, मदत देताना जाचक अटी आणि अनावश्यक प्रशासकीय विलंब टाळावा, पात्र नुकसानग्रस्त शेतकरी मदतीपासून वंचित राहणार नाहीत याची दक्षता घ्यावी, तसेच पीककर्जाच्या परतफेडीसाठी आवश्यक सवलती द्याव्यात, अशा मागण्या करण्यात आल्या आहेत. पुढील हंगामासाठी बियाणे, खते आणि इतर शेतीनिविष्ठा खरेदी करण्यासाठी विशेष आर्थिक सहाय्य उपलब्ध करून देण्याची मागणीही निवेदनात करण्यात आली आहे.
शेतकऱ्यांचे प्रत्यक्ष नुकसान, शेतीचा खर्च आणि त्यांची आर्थिक परिस्थिती लक्षात घेऊन मदतीची रक्कम निश्चित करावी. शासनाने या मागण्यांची तातडीने दखल घेऊन सकारात्मक निर्णय घ्यावा, असे आवाहन अॅड. योगेश नाईक यांनी केले आहे.
