शेतीतील वाटणीवरून मुलाकडून वडिलांचा खून — अंतुर्ली हादरले

मुक्ताईनगर प्रतिनिधी :
मुक्ताईनगर तालुक्यातील अंतुर्ली येथे शेतीच्या वाटणीवरून झालेल्या वादातून मुलाने वडिलांचा खून केल्याची धक्कादायक घटना शनिवारी (१ नोव्हेंबर) रोजी रात्री घडली. गंभीर जखमी झालेल्या वडिलांचा उपचारादरम्यान रविवारी (२ नोव्हेंबर) पहाटे मृत्यू झाला असून या घटनेमुळे अंतुर्ली परिसरात खळबळ उडाली आहे.

घटनेचे स्वरूप :
मिळालेल्या माहितीनुसार, रवींद्र रमेश तायडे (वय २७, रा. इंदिरानगर, फुकटपुरा, अंतुर्ली) यांनी मुक्ताईनगर पोलिसात फिर्याद दिली आहे. फिर्यादीनुसार, त्यांचे चुलते जगदीश दामू तायडे (वय ७३) यांना त्यांचा मुलगा गणेश तायडे याने बेदम मारहाण करून ठार मारले. गणेश तायडे हा दारूच्या नशेत नियमितपणे घरात भांडणे करत असे. तायडे कुटुंबाची तीन एकर वारसाहक्काची शेती रावेर तालुक्यातील आंदलवाडी येथे असून, ती चुलते मधुकर तायडे यांच्या ताब्यात आहे. या शेतीचा वाटा मिळावा किंवा तिच्या नफ्यात आपला हिस्सा द्यावा, अशी गणेशची वडिलांकडे वारंवार मागणी होती.

वाद आणि हल्ला :
शनिवारी रात्री सुमारास ८ वाजता गणेश कामावरून परतल्यावर त्याचे आईशी भांडण झाले. आईने त्याला जेवण देऊन गोठ्यात झोपण्यास सांगितले. त्यानंतर सुमारास १०.३० वाजता गणेश गोठ्यातून बाहेर येऊन आपल्या चुलत भावाला रवींद्र तायडे याला म्हणाला — “मी बापाला मारले आहे आणि त्यांना विहिरीत टाकून देणार.”
ही गोष्ट ऐकल्यानंतर रवींद्र तायडे यांनी मित्र राहुल शिरतुरे, सागर गाडे व रोहित तायडे यांना घेऊन तात्काळ गोठ्यात धाव घेतली. तिथे जगदीश तायडे हे बाजेवर झोपलेले आढळले. त्यांच्या चेहऱ्यावर व हातावर गंभीर जखमा होत्या, चेहरा रक्ताने माखलेला होता व डावा हात कोपरातून मोडलेला होता.

शेवटचे शब्द :
राहुल शिरतुरे यांनी मोबाईलवर व्हिडिओ रेकॉर्डिंग सुरू करून विचारले असता, जगदीश तायडे यांनी “मला गणेशने मारले आहे” असे स्पष्ट सांगितले. त्यानंतर त्यांना तातडीने रुग्णवाहिकेतून जळगाव शासकीय रुग्णालयात हलवण्यात आले. मात्र रविवारी पहाटे पाचच्या सुमारास उपचारादरम्यान त्यांचा मृत्यू झाला.

पोलिस तपास :
या घटनेबाबत मुक्ताईनगर पोलिस ठाण्यात गणेश तायडे याच्याविरुद्ध कलम ३०२ अंतर्गत खुनाचा गुन्हा दाखल करण्यात आला आहे. घटनेनंतर गणेश फरार झाला असून पोलिसांनी त्याच्या शोधासाठी पथक रवाना केले आहे. घटनास्थळावरून रक्ताचे डाग, विटा व कुर्‍हाडीचा दांडा जप्त करण्यात आला आहे. पुढील तपास पोलीस निरीक्षकांच्या मार्गदर्शनाखाली सुरू आहे. उपनिरीक्षक निलेश गोसावी यांच्या मार्गदर्शना खाली मुक्ताईनगर पोलीस स्टेशन अंतर्गत असलेले अंतुर्ली दुरुक्षेत्र पोलीस स्टेशनचे कर्मचारी. पोलीस हेडकॉन्स्टेबल सुरेश मेढे, पोलीस हेडकॉन्स्टेबल राजकुमार चव्हाण, पोलीस अंमलदार राजेश महाजन व मुकेश महाजन या पोलीस कर्मचाऱ्यांनी अवघ्या काही तासातच सापळा रचून आरोपिला अटक केली आहे.

सामाजिक प्रतिक्रिया :
वडिलांच्या हत्येने अंतुर्ली परिसरात शोककळा पसरली असून, शेतीवरील वाद आणि व्यसनाच्या आहारी गेलेल्या मुलामुळे एका पित्याचा जीव गेला ही बाब ग्रामस्थांत हळहळ व्यक्त होत आहे.