पोटनिवडणुकीतून काँग्रेसची अखेर माघार… सुनेत्रा पवारांचा विजयाचा मार्ग मोकळा…
स्टार भारत लाईव्ह एक्सप्रेस प्रतिनिधी
काँग्रेसची माघार – राजकीय समीकरणांचा नवा अध्याय की रणनीतीतील बदल?बारामती विधानसभा पोटनिवडणुकीच्या पार्श्वभूमीवर काँग्रेसने घेतलेला माघारीचा निर्णय राज्याच्या राजकारणात चर्चेचा विषय ठरला आहे. हर्षवर्धन सपकाळ यांनी पत्रकार परिषदेत उमेदवार आकाश मोरे यांची उमेदवारी मागे घेत असल्याची घोषणा केली आणि त्यामुळे या निवडणुकीचे समीकरण एका क्षणात बदलले.काँग्रेसने आधी आकाश मोरे यांना उमेदवारी देत बारामतीत आपली ताकद आजमावण्याची तयारी दर्शवली होती. मात्र सुनिता पवार यांच्या विनंतीचा मान राखत घेतलेला हा निर्णय केवळ स्थानिक नव्हे, तर राज्यस्तरीय राजकीय समन्वयाचा भाग असल्याचे संकेत देतो. या निर्णयामुळे राष्ट्रवादी काँग्रेसच्या शिष्टाईला यश मिळाल्याचे स्पष्टपणे दिसून येते.यामुळे महायुतीच्या उमेदवार सुनेत्रा पवार यांचा विजयाचा मार्ग अधिक सुकर झाल्याची चर्चा राजकीय वर्तुळात रंगू लागली आहे. बारामतीसारख्या राजकीयदृष्ट्या संवेदनशील मतदारसंघात विरोधकांचा प्रमुख पक्ष माघार घेतो, ही बाब केवळ निवडणुकीपुरती मर्यादित नसून आगामी राजकीय आघाड्यांच्या दिशादर्शक ठरू शकते.दरम्यान, या निर्णयामागे पक्षश्रेष्ठींचे निर्देश असल्याचेही स्पष्ट झाले आहे. काँग्रेसचे राष्ट्रीय अध्यक्ष मल्लिकार्जुन खर्गे यांच्या आदेशानुसारच आपण अर्ज मागे घेत असल्याचे आकाश मोरे यांनी सांगितले. “कार्यकर्त्यांनी माझ्यासाठी प्रामाणिकपणे लढा दिला, त्यामुळे माघार घेताना मनाला वेदना होत आहेत,” अशी भावना त्यांनी व्यक्त केली.राजकीय विश्लेषण :काँग्रेसची ही माघार तात्पुरती राजकीय रणनीती आहे की दीर्घकालीन आघाडीचा भाग, हा खरा प्रश्न आहे. एकीकडे विरोधकांमध्ये समन्वय साधण्याचा प्रयत्न दिसतो, तर दुसरीकडे काँग्रेसच्या स्वतंत्र राजकीय अस्तित्वावरही प्रश्नचिन्ह निर्माण होऊ शकते.बारामतीतील हा निर्णय आगामी निवडणुकांसाठी “मैत्री की मजबुरी?” या चर्चेला नवे परिमाण देणारा ठरतो आहे.
