जळगाव जामोद शहरात बिबट्याचा वावर; नागरिकांमध्ये भीतीचं वातावरण…!

स्टार भारत लाईव्ह एक्सप्रेस

प्रतिनिधी:- मुकिंदा गव्हांदे जळगाव जामोद

जळगाव जामोद: २० मार्च २०२६
शहरात आणि परिसरात गेल्या काही दिवसांपासून बिबट्याच्या वावरामुळे नागरिकांमध्ये भीतीचं वातावरण निर्माण झाले आहे. 16 ते 18 मार्च 2026 दरम्यान बिबट्या शहरातील विविध भागात दिसल्याची माहिती समोर आली आहे. विशेष म्हणजे हा बिबट्या रात्रीच्या वेळी रहिवासी भागात मुक्तपणे फिरताना आढळून आला असून काही ठिकाणी तो घरांच्या आसपास आणि रस्त्यावरही फिरताना दिसला आहे.
17 मार्च रोजी बिबट्याची हालचाल सीसीटीव्ही कॅमेऱ्यात स्पष्टपणे कैद झाली असून त्यामुळे या घटनेची खात्री झाली आहे. तसेच काही भागात बिबट्याच्या पाऊलखुणा (pugmarks) देखील आढळून आल्या आहेत. शहरातील काही नागरिकांनी आमदार संजय कुटे यांच्या निवासस्थानाजवळील परिसरातही बिबट्याचा वावर असल्याचे सांगितले आहे.
हा बिबट्या मुख्यतः रात्री आणि पहाटेच्या सुमारास सक्रिय असल्याचे दिसून येत असून दिवसाच्या वेळेत तो जवळील शेती, झाडाझुडपं आणि शांत भागात लपून बसत असल्याची शक्यता व्यक्त केली जात आहे. जंगल क्षेत्र कमी होणे, अन्नाच्या शोधात गावाकडे वळणे आणि उसाच्या शेतीत लपण्यासाठी योग्य जागा मिळणे ही बिबट्या शहरात येण्यामागील मुख्य कारणे असल्याचे तज्ज्ञांचे मत आहे.
दरम्यान, सध्या तरी बिबट्याने कोणत्याही नागरिकावर हल्ला केल्याची नोंद नाही. मात्र त्याचा वावर वाढत असल्याने धोका नाकारता येत नाही. या पार्श्वभूमीवर वनविभाग सतर्क झाला असून बिबट्याच्या हालचालींवर लक्ष ठेवण्यात येत आहे. पाऊलखुणांची तपासणी सुरू असून गरज भासल्यास बिबट्याला पकडण्यासाठी पिंजरा लावण्याची तयारी केली जात आहे.
नागरिकांनी रात्रीच्या वेळी एकटे बाहेर न पडणे, लहान मुलांना घराबाहेर एकटे न सोडणे, तसेच शेतात किंवा बाहेर जाताना गटाने जाणे अशा सूचना प्रशासनाकडून देण्यात आल्या आहेत. बिबट्या दिसल्यास त्वरित वनविभाग किंवा स्थानिक प्रशासनाला कळवावे, असे आवाहनही करण्यात आले आहे…..