सहा महिन्यांपासून बेपत्ता असलेल्या महिलेचा शोध; मुक्ताईनगर पोलिसांची यशस्वी कामगिरी
मुक्ताईनगर प्रतिनिधी :
तालुक्यातील कुऱ्हा वडोदा येथील सहा महिन्यांपूर्वी बेपत्ता झालेल्या महिलेचा शोध घेण्यात मुक्ताईनगर पोलीस स्टेशन यांना यश आले आहे. या कामगिरीमुळे संबंधित कुटुंबीयांमध्ये समाधान व्यक्त करण्यात येत आहे.
सदर महिला काही कारणास्तव घरातून निघून गेल्यानंतर तिचा ठावठिकाणा लागत नव्हता. कुटुंबीयांनी तक्रार दाखल केल्यानंतर पोलिसांनी विविध ठिकाणी शोधमोहीम सुरू केली होती. पोलीस निरीक्षक आशिष अडसूळ यांच्या मार्गदर्शनाखाली विशेष पथक तयार करण्यात आले.
या पथकात पोलीस हवालदार संदीप वानखेडे, पोलीस कर्मचारी दीपक. ढाकरे तसेच महिला पोलीस कर्मचारी सुवर्ण पाटील यांचा समावेश होता. पोलिसांनी तांत्रिक माहिती व गोपनीय सूत्रांच्या मदतीने बुलढाणा जिल्हा येथे शोध घेत अखेर संबंधित महिलेचा शोध लावला.
महिलेची आवश्यक चौकशी करून तिला सुखरूप तिच्या कुटुंबीयांच्या ताब्यात देण्यात आले. या उल्लेखनीय कामगिरीबद्दल नागरिकांकडून मुक्ताईनगर पोलिसांचे कौतुक करण्यात येत आहे.
