जी.जी. खडसे महाविद्यालयासमोर ‘रोड रोमिओ’ अड्डा – विद्यार्थिनींच्या सुरक्षिततेचा गंभीर प्रश्न

मुक्ताईनगर –
शिक्षणाचं मंदिर म्हणून ओळखलं जाणारं खडसे महाविद्यालय सध्या एका गंभीर आणि चिंताजनक कारणामुळे चर्चेत आहे. महाविद्यालयाच्या मुख्य प्रवेशद्वारासमोर खुलेआम सुरू असलेला तथाकथित ‘रोड रोमिओ’ अड्डा हा विद्यार्थिनींच्या सुरक्षिततेला थेट आव्हान देणारा ठरत आहे.

दररोज कॉलेजच्या वेळेत काही टवाळखोर युवक महाविद्यालयासमोर थांबून विद्यार्थिनींकडे अश्लील नजरा, शेरेबाजी, पाठलाग व मानसिक त्रास देत असल्याच्या तक्रारी सातत्याने समोर येत आहेत. या परिस्थितीमुळे अनेक विद्यार्थिनी भीतीच्या वातावरणात शिक्षण घेत असून, पालकांमध्येही प्रचंड अस्वस्थता पसरली आहे.

प्राचार्य व प्रशासनाचे अक्षम्य दुर्लक्ष

या गंभीर विषयाकडे महाविद्यालयाच्या प्राचार्यांनी अद्याप ठोस भूमिका घेतलेली नसल्याचे चित्र आहे. कॉलेज परिसरात महिला सुरक्षेसाठी आवश्यक असलेली शिस्त, नियंत्रण, सीसीटीव्ही, सुरक्षा कर्मचारी किंवा पोलिसांशी समन्वय या बाबींकडे जाणीवपूर्वक दुर्लक्ष होत असल्याचा आरोप होत आहे.

शिक्षकांचा अभाव आणि नियंत्रणशून्य वातावरण

महाविद्यालयातील शिक्षकवर्गाकडूनही विद्यार्थ्यांवर आवश्यक ते नियंत्रण ठेवले जात नसल्याची खंत व्यक्त केली जात आहे. शैक्षणिक संस्था केवळ अभ्यासक्रमापुरती मर्यादित नसून, विद्यार्थ्यांच्या सुरक्षिततेची जबाबदारीही तितकीच महत्त्वाची असते. मात्र येथे शिस्तभंगाला मूक संमती दिली जात असल्याचा प्रश्न उपस्थित होत आहे.

महिला सुरक्षेचा प्रश्न की व्यवस्थेचा अपयश?

महिला सुरक्षेच्या बाबतीत शासन एकीकडे कठोर कायदे करत असताना, प्रत्यक्षात मात्र शिक्षणसंस्थांच्या दारातच अशा घटना घडत असतील तर ती बाब अत्यंत दुर्दैवी आणि लाजिरवाणी आहे.
आज जर कॉलेज प्रशासनाने याकडे डोळेझाक केली, तर उद्या याचे परिणाम अधिक गंभीर स्वरूपात समोर येऊ शकतात.

तातडीच्या कारवाईची गरज

या प्रकरणी

महाविद्यालय प्रशासनाने तात्काळ पुढाकार घ्यावा

पोलिस प्रशासनाने कॉलेज परिसरात नियमित गस्त वाढवावी

रोड रोमिओंवर कठोर कारवाई करावी

विद्यार्थिनींसाठी सुरक्षित वातावरण निर्माण करावे

अशी ठाम मागणी विद्यार्थी, पालक व नागरिकांतून होत आहे.

विद्यार्थिनी सुरक्षित नसतील, तर शिक्षणाचा अर्थच काय?
हा प्रश्न आता संपूर्ण समाजाने गांभीर्याने घेण्याची वेळ आली आहे.