स्टार भारत लाईव्ह एक्सप्रेस विजय घोडे अकोला प्रतिनिधी
दि. 23 फेब्रु. 2025 : अमरावती विभागातून अकोल्याचे जिल्हाधिकारी अजित कुंभार यांची महाराष्ट्र राज्य बाल हक्क संरक्षण आयोगाद्वारे ‘बालस्नेही पुरस्कार-२०२४’ अंतर्गत उत्कृष्ट जिल्हाधिकारी पुरस्कारासाठी निवड झाली आहे. आयोगाच्या अध्यक्ष ॲड. सुशीबेन शाह यांनी ही निवड जाहीर केली असून मुंबईत यशवंतराव चव्हाण सेंटर येथे दि. ३ मार्च रोजी आयोजित कार्यक्रमात जिल्हाधिका-यांना हा पुरस्कार प्रदान करण्यात येणार असल्याची माहिती विश्वासनीय सूत्रांकडून प्राप्त झाली आहे. राज्याचे उपमुख्यमंत्री अजित पवार, उपमुख्यमंत्री एकनाथराव शिंदे , महिला व बालविकास मंत्री अदिती तटकरे, गृह राज्यमंत्री योगेश कदम, महिला व बालविकास राज्यमंत्री मेघना बोर्डीकर आदी मान्यवर कार्यक्रमाला उपस्थित राहतील. जिल्ह्यात बाल हक्क सप्ताहानिमित्त अनेक उपक्रम राबविण्यात आले. महिला व बालविकास भवन, वन स्टॉप सेंटरसाठी जागा मिळविणे, १०९८ स्टीकर्सवाटप, बालगृहातील बालकांना आवश्यक सुविधांची पूर्तता, बाल हक्क व मतदार जनजागृती तसेच बालविवाहाला प्रतिबंधासाठी सर्वतोपरी प्रयत्न करण्यात आले.
