‘प्रत्येक मुलगी आत्मविश्वासी बनावी’ – ASMITA लीगच्या शुभारंभी रक्षाताई खडसे यांचे आवाहन
स्टार भारत लाईव्ह एक्सप्रेस प्रतिनिधी
छत्रपती संभाजीनगरात ASMITA अ‍ॅथलेटिक्स लीगचा शुभारंभ; महिला क्रीडा सहभाग वाढविण्याचा महत्त्वपूर्ण उपक्रमछत्रपती संभाजीनगर, ८ मार्च : आंतरराष्ट्रीय महिला दिन निमित्त छत्रपती संभाजीनगर येथील भारतीय क्रीडा प्राधिकरण (SAI) केंद्रात ASMITA (Achieving Sports Milestone by Inspiring Women Through Action) अ‍ॅथलेटिक्स लीगचा देशव्यापी शुभारंभ रक्षा खडसे यांच्या हस्ते करण्यात आला.
देशभरातील सुमारे २५० ठिकाणी या लीगचे आयोजन करण्यात आले असून महिलांचा क्रीडा क्षेत्रातील सहभाग वाढविण्याच्या दृष्टीने हा महत्त्वाचा उपक्रम मानला जात आहे.यावेळी बोलताना केंद्रीय युवक व्यवहार व क्रीडा राज्यमंत्री रक्षा खडसे यांनी सांगितले की, भारताच्या ऑलिम्पिक आणि इतर आंतरराष्ट्रीय स्पर्धांमधील पदकसंख्या वाढविण्यासाठी महिलांचा क्रीडा क्षेत्रातील सहभाग मोठ्या प्रमाणात वाढणे आवश्यक आहे. प्रत्येक जिल्ह्यातून खेळाडू घडले पाहिजेत, प्रत्येक मुलगी आत्मविश्वासाने पुढे आली पाहिजे आणि फिटनेस ही राष्ट्रीय सवय बनली पाहिजे, असे त्यांनी स्पष्ट केले.या कार्यक्रमादरम्यान ASMITA अंतर्गत योग, वूशू, किकबॉक्सिंग आणि वेटलिफ्टिंग लीगचे उद्घाटनही करण्यात आले. तसेच फिटनेस आणि क्रीडा सहभागाला चालना देण्यासाठी आयोजित करण्यात आलेल्या सायक्लोथॉन आणि वॉकथॉन स्पर्धांना हिरवा झेंडा दाखविण्यात आला.हा कार्यक्रम MY Bharat, छत्रपती संभाजीनगर महानगरपालिका आणि महाराष्ट्र राज्य क्रीडा विभाग यांच्या सहकार्याने आयोजित करण्यात आला.ASMITA उपक्रमाबाबत माहिती देताना रक्षा खडसे म्हणाल्या की, महिलांना क्रीडा क्षेत्रात समान संधी देणे ही केवळ सामाजिक गरज नसून राष्ट्रनिर्मितीचा महत्त्वाचा पाया आहे. महिलांना योग्य संधी मिळाल्यास समाज अधिक सशक्त बनतो. २०२१ मध्ये नरेंद्र मोदी यांच्या नेतृत्वाखाली ASMITA कार्यक्रम सुरू करण्यात आला असून ग्रामीण, आदिवासी आणि शालेय स्तरावरून प्रतिभावान महिला खेळाडू शोधण्याचे काम या माध्यमातून सुरू आहे.आतापर्यंत ASMITA लीग अंतर्गत ३३ क्रीडा प्रकारांमध्ये सुमारे २६०० लीग स्पर्धा आयोजित करण्यात आल्या असून जवळपास ३ लाख महिलांनी सहभाग नोंदवला आहे. २०२५–२६ या कालावधीतच १२८७ लीगमध्ये सुमारे १.५९ लाख महिलांचा सहभाग नोंदवला गेला आहे.यावर्षी आंतरराष्ट्रीय महिला दिन निमित्त देशभरातील २५० ठिकाणी १०० मीटर, २०० मीटर आणि ४०० मीटर धावांच्या स्पर्धा आयोजित करण्यात आल्या. या स्पर्धांमध्ये १३ वर्षांखालील, १३–१८ आणि १८ वर्षांवरील मुलींसाठी स्वतंत्र गट ठेवण्यात आले होते. देशभरातून सुमारे २ लाख मुलींनी या एकदिवसीय स्पर्धेत सहभाग घेतला, ही या उपक्रमाची मोठी वैशिष्ट्यपूर्ण बाब ठरली.Khelo India, Fit India Movement, MY Bharat आणि ASMITA या उपक्रमांच्या माध्यमातून भारत अधिक सक्षम, तंदुरुस्त आणि महिला-केंद्रित क्रीडा संस्कृतीकडे वाटचाल करत असल्याचा विश्वासही त्यांनी व्यक्त केला.
