“तरुणांच्या दबावामुळेच संघाला संवादाची आठवण; अभिजीत दिपकेंचा मोहन भागवत, भाजप व संघावर हल्लाबोल”
“उपदेश नव्हे, युवा नेतृत्वाला संधी द्या; अभिजीत दिपकेंची संघ-भाजपवर परखड टीका”
छत्रपती संभाजीनगर | प्रतिनिधी
कॉक्रोच जनता पार्टी (सीजेपी)चे संस्थापक अध्यक्ष अभिजीत दिपके यांनी राष्ट्रीय स्वयंसेवक संघ, भाजप आणि सत्ताधाऱ्यांवर विविध राजकीय व सामाजिक मुद्द्यांवर परखड टीका केली. मंगळवारी छत्रपती संभाजीनगर येथे आयोजित पत्रकार परिषदेत त्यांनी तरुणांच्या प्रश्नांपासून ते विद्यार्थी आंदोलन, संघाच्या भूमिकेपर्यंत अनेक विषयांवर आपली भूमिका स्पष्ट केली.
राष्ट्रीय स्वयंसेवक संघाचे सरसंघचालक मोहन भागवत हे ६ ऑगस्ट रोजी मुंबईत जेन झी आणि जेन अल्फा पिढीतील विद्यार्थ्यांशी संवाद साधणार असल्याच्या पार्श्वभूमीवर दिपके म्हणाले की, देशातील तरुणांच्या वाढत्या आंदोलनांमुळे आणि त्यांच्या दबावामुळेच प्रस्थापित संघटनांना आता तरुणांशी थेट संवाद साधण्याची गरज भासू लागली आहे. ही सकारात्मक बाब असली तरी तरुणांच्या प्रश्नांवर केवळ ज्येष्ठांनी मार्गदर्शन करण्यापेक्षा युवा नेतृत्वाला संधी देणे अधिक आवश्यक असल्याचे त्यांनी नमूद केले.
जंतर-मंतर येथे झालेल्या विद्यार्थी आंदोलनावर संघाचे ज्येष्ठ नेते अतुल लिमये यांनी केलेल्या टीकेलाही दिपके यांनी प्रत्युत्तर दिले. लोकशाही आणि संविधानाबाबत आम्हाला धडे देण्याऐवजी तरुणांच्या प्रश्नांवर सकारात्मक भूमिका घ्यावी, असे सांगत त्यांनी संघाच्या विचारधारेवरही टीका केली.
शिवसेना (शिंदे गट) आणि भाजप नेत्यांशी झालेल्या भेटीबाबत निर्माण झालेल्या चर्चेवरही त्यांनी स्पष्टीकरण दिले. संबंधित भेट ही केवळ सदिच्छा भेट होती, त्यामागे कोणताही राजकीय हेतू नसल्याचे त्यांनी स्पष्ट केले. तसेच, सत्ताधाऱ्यांकडे ईडी व सीबीआयसारख्या यंत्रणा असताना एका ३० वर्षीय तरुणाची भीती बाळगण्याचे कारण नसल्याचा टोला त्यांनी लगावला.
यावेळी त्यांनी ई-२० इंधनाच्या मुद्द्यावर सुरू असलेल्या आंदोलनाचाही उल्लेख करत, हा विषय देश आणि पर्यावरणाच्या दृष्टीने महत्त्वाचा असल्याचे सांगितले.
देशातील तरुणांचा वाढता राजकीय सहभाग आणि सामाजिक प्रश्नांवरील सक्रियता लक्षात घेता विविध राजकीय व सामाजिक संघटनांना संवादाचा मार्ग स्वीकारावा लागत असल्याचे चित्र दिसून येत आहे. लोकशाहीत प्रत्येकाला मत मांडण्याचा आणि प्रश्न विचारण्याचा अधिकार आहे. मात्र, वैचारिक मतभेद हे परस्पर संवाद आणि विधायक चर्चेद्वारे सोडविण्याचा प्रयत्न होणे, हीच लोकशाहीची खरी ताकद ठरेल.
