( स्टार भारत लाईव्ह एक्सप्रेस प्रतिनिधी शेगाव मिलिंद चराटे) जलंब येथील रेल्वे स्टेशन परिसरातील पिंपळाच्या झाडावर वीज पडल्यामुळे ४० पोपटांचा मृत्यू झाला. ही घटना ७ एप्रिल रोजी रात्री ९ वाजताच्या सुमारास घडली.जलंब येथे शुक्रवारी रात्री विजेच्या कडकडासह अवकाळी पाऊस पडला. यामध्ये जलंब येथील रहिवासी प्रमोद गव्हांदे यांच्या घराजवळ असलेल्या पिंपळाच्या झाडावर वीज पडल्यामुळे पिंपळावर असलेल्या ४० पोपटांचा खाली पडून मृत्यू झाला. मृत्युमुखी पडलेल्या त्या ४० पोपटांचा झाडाखाली सडा पडलेला होता. दरम्यान, शनिवारी सकाळी त्या मृत्युमुखी पडलेल्या पोपटांना पाहण्यासाठी नागरिकांनी एकच गर्दी केली होती. परिसरात शुक्रवारी झालेल्या अवकाळी पावसामुळे रब्बी पिकांचे मोठ्या प्रमाणात नुकसान झाले. त्यामुळे नुकसानग्रस्तांना मदत देण्याची मागणी होत आहे.
