मुक्ताईनगर तालुक्यात वाघाची धास्ती; वनविभागाचे आवाहन मात्र नागरिक चिंताग्रस्त

मुक्ताईनगर तालुक्यात वढवे, मानेगाव, कोथळी भागात पट्टेदार वाघाचा वावर असल्याचे स्पष्ट झाले असून, गेल्या काही दिवसांपासून गावकऱ्यांनी दिलेल्या माहितीला अखेर वनविभागानेही दुजोरा दिला आहे.

दिनांक २ ऑक्टोबर रोजी रात्री ११ वाजता चांगदेव-शिवराम भागात वाघ दिसल्याने एका महिलेला मुर्च्छा आल्याची घटना घडली. यानंतर वनविभागाचे अधिकारी मुक्ताईनगर व रूईखेडा रेंजच्या पथकांसह घटनास्थळी दाखल झाले; मात्र प्रत्यक्ष पायांचे ठसे त्यांना सापडले नाहीत. तरी नागरिकांच्या तक्रारी व गावकऱ्यांच्या सततच्या माहितीवरून वाघाचा वावर असल्याचे मान्य करण्यात आले आहे.

नागरिकांचा प्रशासनाला सवाल :

वाघाचे हालचाली अनेक दिवसांपासून दिसत असतानाही वनविभाग इतका ढिलाईने का वागत होता?

नागरिकांच्या जीवितास धोका असूनही गस्त पथक व सुरक्षा साधने अद्याप तातडीने का उपलब्ध नाहीत?

महिलांना भीतीने मुर्च्छा येईपर्यंत प्रशासनाला वाट पाहावी लागते का?

वनविभागाचे स्पष्टीकरण :

वनविभागाने प्रेस नोटद्वारे सांगितले की –

वाघाच्या हालचालींवर सतत लक्ष ठेवले जात आहे.

शेतकऱ्यांना गटाने शेतात जाण्याचे, मुले व वयोवृद्धांनी रात्री बाहेर न पडण्याचे आवाहन केले आहे.

पथके व अधिकारी सतत गस्त घालत आहेत.

कुठलीही घटना टाळण्यासाठी खबरदारीचे उपाय करण्यात येत आहेत.

नागरिकांची भीती कायम :

वनविभागाने आवाहन केले असले तरी ग्रामस्थांचा विश्वास बसत नाही. कारण –

वाघ गेल्या ४-५ दिवसांपासून सतत दिसत असूनही उपाययोजना धीम्या गतीने सुरू आहेत.

रात्रीच्या वेळेस शेतकऱ्यांचे शेतमजुरीचे काम धोक्यात आहे.

गुरेढोरे चरायला नेताना मोठा धोका असल्याने जनतेत तीव्र असुरक्षिततेचे वातावरण आहे.