वाद विकोपाला; चाकूने पोटावर वार करून तरुणाला गंभीर जखमी केल्याचा आरोप
माळीपुऱ्यात जुन्या भांडणाचा थरार; सोमेश डांगे गंभीर जखमी, जालना येथे उपचार सुरू
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा : जुन्या भांडणाच्या कारणावरून झालेल्या वादाचे पर्यवसान चाकूहल्ल्यात झाल्याची घटना देऊळगाव राजा शहरातील माळीपुरा परिसरात घडली. आरोपीने वादादरम्यान तरुणाच्या पोटात चाकूने वार करून त्याला गंभीर जखमी केल्याचा आरोप आहे. जखमी सोमेश प्रणयकांत डांगे (वय २८, रा. माळीपुरा, देऊळगाव राजा) यांच्यावर जालना येथील कलावती हॉस्पिटलमध्ये अतिदक्षता विभागात उपचार सुरू आहेत. या घटनेमुळे परिसरात खळबळ उडाली आहे.
या प्रकरणी प्रणयकांत श्रीराम डांगे (वय ६६, व्यवसाय खासगी नोकरी, रा. माळीपुरा, देऊळगाव राजा) यांनी देऊळगाव राजा पोलिस ठाण्यात तक्रार दाखल केली आहे. त्यांच्या तक्रारीवरून केतन विजय तिडके (रा. माळीपुरा, देऊळगाव राजा) याच्याविरुद्ध भारतीय न्याय संहिता (BNS) कलम १०९(१) अन्वये गुन्हा दाखल करण्यात आला आहे.
जुन्या वादातून चाकूहल्ला
पोलिसांनी दिलेल्या माहितीनुसार, २ ऑक्टोबर २०२६ रोजी सकाळी ९.४५ वाजण्यापूर्वी माळीपुरा परिसरात ही घटना घडली. जुन्या भांडणाच्या कारणावरून आरोपी केतन तिडके याचा सोमेश डांगे याच्यासोबत वाद झाला. या वादाचे रूपांतर हाणामारीत झाले.
त्यानंतर आरोपीने जवळील चाकूने सोमेश डांगे यांच्या पोटावर वार केल्याचे फिर्यादीत नमूद करण्यात आले आहे.
या हल्ल्यात सोमेश डांगे गंभीर जखमी झाले. त्यांना उपचारासाठी सुरुवातीला रुग्णालयात दाखल करण्यात आले. प्रकृती गंभीर असल्याने त्यांना पुढील उपचारासाठी जालना येथील कलावती हॉस्पिटलमध्ये दाखल करण्यात आले असून, तेथील अतिदक्षता विभागात त्यांच्यावर उपचार सुरू आहेत. दुसऱ्या दिवशी गुन्हा दाखल
घटनेनंतर फिर्यादी प्रणयकांत डांगे यांनी दिलेल्या तोंडी रिपोर्टवरून ३ ऑक्टोबर २०२६ रोजी सायंकाळी ५.०५ वाजता देऊळगाव राजा पोलिस ठाण्यात गुन्हा दाखल करण्यात आला.
या प्रकरणाचा तपास पोलीस उपनिरीक्षक नितीन मिंड यांच्याकडे सोपविण्यात आला आहे. गुन्हा दाखल करण्याची कार्यवाही पोलीस उपनिरीक्षक मोहन गिते यांनी केली. पोलिसांकडून घटनेचा पुढील तपास सुरू आहे..
