शहरातील जाफ्राराबाद वेस येथे “सर्जा–राजा”चा पारंपरिक पूजा; श्री बालाजी महाराजांच्या चरणी लीन

पिके करपली, बळीराजा चिंतेत; तरी वर्षभर राबणाऱ्या बैलांची परंपरा कायम

स्टार भारत लाईव्ह एक्सप्रेस

प्रतिनिधी – शंकर शिवरकर

देऊळगावराजा :यंदा पावसाने दडी मारल्यामुळे शेतातील पिके करपून गेली आहेत. ऐन सणासुदीच्या काळात बळीराजा चिंतेच्या गर्तेत सापडला आहे. मात्र, अशा प्रतिकूल परिस्थितीत आणि दुष्काळाच्या गडद सावटातही देऊळगाव राजा शहरातील शेतकऱ्यांनी आपली शतकानुशतके चालत आलेली बैलपोळ्याची परंपरा कायम ठेवली आहे. वर्षभर शेतात अहोरात्र राबणाऱ्या आपल्या लाडक्या बैलांविषयी कृतज्ञता व्यक्त करण्यासाठी गुरुवारी शहरात अत्यंत उत्साहात व भक्तीमय वातावरणात पारंपरिक बैलपोळा उत्सव साजरा करण्यात आला.

श्री बालाजी महाराजांच्या चरणी बैलांची पूजा

प्रसिद्ध श्री बालाजी महाराज नगरी असलेल्या देऊळगाव राजा शहरात पोळ्याचा सण आगळ्यावेगळ्या पद्धतीने साजरा होतो. दुपारी बालाजी महाराजांकडे जाणाऱ्या मुख्य मार्गावरील ऐतिहासिक ‘जाफ्राराबाद वेस’ येथे सर्व शेतकरी आपापल्या सजवलेल्या बैलजोड्या घेऊन एकत्र आले होते. या ठिकाणी बैलांची पारंपारिक पूजा करण्यात आली. शेतकऱ्यांनी आपल्या लाडक्या ‘सर्जा-राजा’ला श्री बालाजी महाराजांच्या चरणी नतमस्तक करून दर्शन घडवले व मनोभावे प्रार्थना केली. त्यानंतर शहरात ठिकठिकाणी सजवलेल्या बैलांची सुवासिनींकडून आरती व पूजा करून मोठ्या सन्मानाने त्यांना पुरणपोळीचा नैवेद्य भरवण्यात आला.

नागरिकांची आणि चिमुकल्यांची मोठी उपस्थिती

शहरातील विविध चौकांमध्ये आणि गल्ल्यांमध्ये सजवलेले बैल पाहण्यासाठी नागरिकांनी मोठी गर्दी केली होती. विशेषतः लहान मुलांमध्ये या सणाचा मोठा उत्साह पाहायला मिळाला. चिमुकल्यांनी मातीचे बैल पुजून आनंद साजरा केला, तर अबालवृद्ध पारंपरिक पद्धतीने निघालेली बैलांची मिरवणूक पाहण्यासाठी रस्त्याच्या दुतर्फा मोठ्या संख्येने उपस्थित होते. ढोल-ताशांचा गजर आणि ‘होय पोळा…’ च्या जयघोषाने अवघे शहर दुमदुमून गेले होते.

पोलिसांचा कडक बंदोबस्त

बैलपोळा उत्सवादरम्यान शहरात कोणतीही अनुचित घटना घडू नये आणि वाहतुकीची कोंडी होऊ नये, यासाठी स्थानिक पोलीस प्रशासनाच्या वतीने जाफ्राराबाद वेस परिसर तसेच मुख्य मार्गांवर कडक पोलीस बंदोबस्त तैनात करण्यात आला होता. शांततेत आणि शिस्तीत हा पारंपारिक सोहळा संपन्न झाला. दुष्काळाचे संकट कितीही मोठे असले तरी बळीराजाने आपल्या संस्कृतीचा आणि मुक्या प्राण्यांबद्दलच्या प्रेमाचा हा सण नेहमीच्याच उत्साहाने साजरा करून आदर्श दाखवून दिला आहे.