विवरा बु. येथे घाणीचे साम्राज्य; ग्रामपंचायतीच्या दुर्लक्षाचा आरोप
महिला शौचालयाजवळ मोठ्या प्रमाणात कचऱ्याचा ढीग; जिल्हा परिषद शाळेतील विद्यार्थ्यांच्या आरोग्याचा प्रश्न ऐरणीवर
स्टार भारत लाईव्ह एक्सप्रेस
जळगाव जिल्हा प्रतिनिधी
विनोद तायडे
विवरा बु. ता रावेर येथे स्वच्छतेच्या प्रश्नाने गंभीर स्वरूप धारण केले असून, गावातील महिला शौचालय परिसरात मोठ्या प्रमाणात कचरा साचल्याचे चित्र समोर आले आहे. शौचालयालगतच कचऱ्याचे ढीग, प्लास्टिक, सुकलेला पालापाचोळा आणि इतर घनकचरा पडून असल्याने परिसरात अस्वच्छतेचे साम्राज्य निर्माण झाले आहे.
विशेष म्हणजे, याच परिसराच्या जवळ जिल्हा परिषद शाळा असल्याने विद्यार्थ्यांच्या आरोग्याचा प्रश्न निर्माण झाला आहे. कचऱ्यामुळे दुर्गंधी, माशा-मच्छरांचा प्रादुर्भाव तसेच अस्वच्छ वातावरण निर्माण होण्याची शक्यता असून, विद्यार्थ्यांना व नागरिकांना संसर्गजन्य आजारांचा धोका निर्माण होऊ शकतो, अशी नागरिकांची चिंता आहे.
शौचालयाजवळच कचरा; स्वच्छतेचा दावा कुठे?
महिला शौचालय परिसरातच मोठ्या प्रमाणात घनकचरा साचलेला असल्याने महिला व नागरिकांकडून नाराजी व्यक्त केली जात आहे. कचऱ्याची नियमित उचल आणि परिसराची स्वच्छता करण्याची जबाबदारी संबंधित ग्रामपंचायतीची असताना, प्रत्यक्षात मात्र परिस्थिती वेगळी असल्याचे नागरिकांचे म्हणणे आहे.
शाळेच्या परिसरात स्वच्छता राखणे आणि विद्यार्थ्यांना सुरक्षित वातावरण उपलब्ध करून देणे अत्यंत आवश्यक असताना, शाळेजवळच कचऱ्याचे ढीग दिसून येत असल्याने ग्रामपंचायतीच्या स्वच्छता व्यवस्थेवर प्रश्नचिन्ह उपस्थित झाले आहे.
जबाबदार कोण? नागरिकांचा थेट सवाल
गावातील सार्वजनिक ठिकाणे व शाळा परिसर स्वच्छ ठेवण्याची जबाबदारी नेमकी कोणाची? कचऱ्याची नियमित उचल का होत नाही? महिला शौचालयाजवळच कचरा साचलेला असताना संबंधित यंत्रणा याकडे दुर्लक्ष का करत आहे? असा सवाल संतप्त नागरिकांकडून उपस्थित केला जात आहे.
ग्रामपंचायतीने तातडीने या परिसराची स्वच्छता करून कचऱ्याची विल्हेवाट लावावी, तसेच भविष्यात अशा प्रकारे कचरा साचणार नाही यासाठी कायमस्वरूपी उपाययोजना करावी, अशी मागणी नागरिकांकडून होत आहे.
विद्यार्थ्यांच्या आरोग्याशी संबंधित प्रश्न असल्याने प्रशासनाने केवळ पाहणी न करता प्रत्यक्ष स्वच्छता मोहीम राबवून ठोस कार्यवाही करावी, अशी नागरिकांची तीव्र मागणी आहे.
