महावितरणचा भोंगळ कारभार: देऊळगाव राजा येथे विजेचा धक्का लागून म्हशीचा जागीच मृत्यू!

नागरिकांमध्ये तीव्र संताप; निष्काळजी अधिकाऱ्यांवर कारवाईसह म्हशी पालन करणाऱ्याला गरीब कुटुंबाला तात्काळ भरपाई देण्याची मागणी

स्टार भारत लाईव्ह एक्सप्रेस

प्रतिनिधी – शंकर शिवरकर

देऊळगाव राजा :येथील पिंपळनेर-सिंदखेडराजा रोडवर महावितरणच्या अत्यंत घातक आणि निष्काळजी कारभारामुळे विजेच्या खांबाला चिकटून एका म्हशीचा जागीच मृत्यू झाल्याची खळबळजनक घटना घडली आहे. या घटनेमुळे स्थानिक नागरिकांसह पशुपालकांमध्ये महावितरण प्रशासनाविरोधात प्रचंड रोष निर्माण झाला असून, संबंधित कर्मचाऱ्यांवर तात्काळ कडक कारवाई करण्याची मागणी केली जात आहे.

मुख्य रस्त्यावर मृत्यूचा सापळा

मिळालेल्या माहितीनुसार, हा अपघात ज्या ठिकाणी घडला तो पिंपळनेर-सिंदखेडराजा मार्ग हा मुख्य हायवे (महामार्ग) आहे. या रस्त्यावरून दिवस-रात्र शेकडो वाहने आणि नागरिकांची मोठी वर्दळ असते. विशेष म्हणजे, याच शिवारात प्रसिद्ध हनुमान मंदिर देवस्थान आहे. या देवस्थानात दर्शनासाठी दररोज बाहेरगाववरून अनेक भाविक व नागरिक याच मुख्य रस्त्याने ये-जा करत असतात. अशा वर्दळीच्या आणि धार्मिक महत्त्वाच्या ठिकाणी महावितरणने उघडे ठेवलेले विजेचे खांब आणि तारा थेट मृत्यूचा सापळा बनल्याचे या घटनेवरून स्पष्ट झाले आहे.

‘माणसाचा जीव गेला असता तर जबाबदार कोण?

’या अपघातात एका गरीब कुटुंबातील दुभत्या म्हशीचा जागीच दुर्दैवी अंत झाला. सुदैवाने यावेळी कोणताही माणूस या खांबाच्या संपर्कात आला नाही, अन्यथा मोठी जीवितहानी झाली असती. “जर या ठिकाणी एखाद्या भाविकाचा किंवा स्थानिक नागरिकाचा जीव गेला असता, तर त्याला जबाबदार कोण राहिले असते?” असा संतप्त सवाल आता स्थानिक नागरिक उपस्थित करत आहेत. महावितरण आणखी किती बळींची वाट पाहत आहे, असा टोलाही नागरिकांनी लगावला आहे.

तात्काळ भरपाई आणि कारवाईची मागणी

पशुपालन करून आपले कुटुंब चालवणाऱ्या एका गरीब व्यक्तीचे या घटनेमुळे मोठे आर्थिक नुकसान झाले आहे. त्यामुळे महावितरणच्या वरिष्ठ अधिकाऱ्यांनी या घटनेची तात्काळ दखल घेऊन पीडित पशुपालकाला योग्य ती नुकसानभरपाई मंजूर करावी, अशी मागणी जोर धरत आहे. तसेच, कर्तव्यात कसुरी करणाऱ्या आणि या भागातील वीज वाहिन्यांच्या सुरक्षेकडे जाणीवपूर्वक दुर्लक्ष करणाऱ्या संबंधित वायरमन व अभियंत्यांवर निलंबनाची कारवाई करावी, अन्यथा तीव्र आंदोलन छेडण्यात येईल, असा इशारा देऊळगाव राजा येथील स्थानिक नागरिकांनी दिला आहे.