प्रशिक नगरच्या प्रवेशद्वाराच्या नामकरणावरून वादाची शक्यता; रहिवाशांचा प्रशासनाला इशारा

संपादकीय बातमी

मुक्ताईनगर : प्रशिक नगर येथील मुख्य प्रवेशद्वाराच्या नामकरणावरून स्थानिक रहिवाशांमध्ये नाराजी निर्माण झाली असून, या प्रश्नाला आता कायदा व सुव्यवस्थेचे स्वरूप येण्याची शक्यता व्यक्त करण्यात आली आहे. प्रशिक नगरच्या रहिवाशांनी जिल्हाधिकारी, सार्वजनिक बांधकाम विभाग तसेच मुक्ताईनगर नगरपंचायतीकडे लेखी निवेदन देत प्रवेशद्वाराला ‘प्रशिक नगर प्रवेशद्वार’ असे नाव देण्याची मागणी केली आहे.

निवेदनानुसार, प्रशिक नगरमध्ये गेल्या ४५ ते ५० वर्षांपासून रहिवाशांचे वास्तव्य असून, या वस्तीची प्रशिक नगर अशी दप्तरी नोंद असल्याचा दावा करण्यात आला आहे. सार्वजनिक बांधकाम विभाग व नगरपंचायतीमार्फत मुख्य रस्त्यावर प्रवेशद्वार उभारण्यात आले आहे. मात्र, या प्रवेशद्वाराला कोणते नाव देण्यात येणार आहे, याबाबत स्थानिक रहिवाशांना पूर्वसूचना देण्यात आली नसल्याची तक्रार निवेदनातून करण्यात आली आहे.

नामकरणाचा प्रश्न केवळ नावापुरता मर्यादित न राहता सामाजिक व कायदा-सुव्यवस्थेचा प्रश्न निर्माण करू शकतो, अशी भूमिका रहिवाशांनी घेतली आहे. प्रवेशद्वाराला प्रशिक नगरव्यतिरिक्त अन्य नाव देण्यात आल्यास सामाजिक किंवा जातीय तेढ निर्माण होण्याची शक्यता असल्याचे निवेदनात नमूद करण्यात आले आहे. त्यामुळे भविष्यात कोणताही अनुचित प्रकार घडू नये, यासाठी प्रशासनाने निर्णय घेताना स्थानिक नागरिकांच्या भावना व उपलब्ध शासकीय नोंदींचा विचार करावा, अशी मागणी करण्यात आली आहे.

दरम्यान, प्रवेशद्वाराच्या नामकरणावरून भविष्यात वाद किंवा तणाव निर्माण होऊ नये, यासाठी संबंधित प्रशासनाने सर्व पक्षांची बाजू ऐकून पारदर्शक निर्णय घेणे आणि आवश्यक त्या प्रतिबंधात्मक उपाययोजना करणे गरजेचे ठरणार आहे. कायदा व सुव्यवस्था अबाधित ठेवण्याच्या दृष्टीने प्रशासनाने या निवेदनाची गांभीर्याने दखल घ्यावी, अशी अपेक्षा व्यक्त होत आहे.

निवेदनाच्या प्रती विविध राजकीय व सामाजिक पदाधिकाऱ्यांना देण्यात आल्याने हा विषय आता अधिक व्यापक चर्चेचा ठरण्याची शक्यता आहे. प्रशासनाच्या पुढील निर्णयाकडे प्रशिक नगर परिसरातील नागरिकांचे लक्ष लागले आहे.