देऊळगावमाही-देऊळगावराजा मार्गावर ट्रॅक्टरची धडक; पादचाऱ्याचा मृत्यू
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगावमाही : देऊळगावमाही येथून देऊळगावराजाकडे जाणाऱ्या मार्गावर ट्रॅक्टरने पादचाऱ्याला मागून धडक दिल्याने शेख महेबुब शेख बिस्मिल्ला (वय अंदाजे 38) यांचा मृत्यू झाल्याची घटना 1 ऑक्टोबर रोजी रात्री घडली. याप्रकरणी देऊळगाव राजा पोलिस ठाण्यात 6 ऑक्टोबर रोजी ट्रॅक्टरचालकाविरुद्ध गुन्हा दाखल करण्यात आला आहे.
FIRमध्ये नमूद माहितीनुसार, शेख महेबुब शेख बिस्मिल्ला हे रात्रीच्या सुमारास देऊळगावमाही येथून रस्त्याने पायी जात असताना लाल रंगाच्या MH-28-BQ-9561 क्रमांकाच्या ट्रॅक्टरने त्यांना मागून धडक दिली. या अपघातात ते गंभीर जखमी झाले. घटनेनंतर त्यांना उपचारासाठी शासकीय दवाखाना, देऊळगावमाही येथे नेण्यात आले. मात्र, डॉक्टरांनी तपासून त्यांना मृत घोषित केले.
यानंतर पोलिसांनी घटनास्थळी तसेच शासकीय दवाखान्यात आवश्यक पंचनामा करून मृतदेह शवविच्छेदनासाठी पाठविला. शवविच्छेदनानंतर मृतदेह नातेवाइकांच्या ताब्यात देण्यात आला व अंत्यविधी पार पडल्याचे FIRमध्ये नमूद आहे.
या घटनेप्रकरणी देऊळगाव राजा पोलिस ठाण्यात मोटार वाहन अधिनियम, 1988 मधील कलम 134 तसेच भारतीय न्याय संहिता, 2023 मधील कलम 281 आणि 106(1) अन्वये गुन्हा नोंदविण्यात आला आहे. प्रकरणाचा तपास पोलिस हवालदार कलीम शफी देशमुख यांच्याकडे सोपविण्यात आला आहे.
FIRमध्ये ट्रॅक्टरचालकाने वाहन भरधाव व निष्काळजीपणे चालवून धडक दिल्याचा आरोप करण्यात आला आहे. या आरोपांची सत्यता तपासातून स्पष्ट होणार असून, आरोपीचा दोष न्यायालयीन प्रक्रियेत सिद्ध होणे बाकी आहे.
