तालुक्यातील जनतेने ‘महात्मा ज्योतिबा फुले , महसूल लोक अदालत अभियानात सहभागी व्हावे.तहसीलदार- विजय सवडे

स्टार भारत लाईव्ह एक्सप्रेस

प्रतिनिधी- चिखली

चिखली-दि.११

जिल्ह्यात दि. १ सप्टेंबर, २०२६ ते ३१ मार्च, २०२७ या कालावधीत “महात्मा जोतिराव फुले महसूल लोक अदालत अभियान” राबविण्यात येत आहे. क्रांतीसूर्य महात्मा जोतिराव फुले यांच्या द्विशताब्दी जयंती वर्षाचे औचित्य साधून महसूल न्यायालयातील प्रलंबित अर्धन्यायिक दावे व अपीले आपापसातील सामंजस्य व तडजोडीने कायमस्वरूपी निकाली काढण्यासाठी हे विशेष अभियान आयोजित करण्यात आले आहे.
या अभियानांतर्गत मंडळ अधिकारी व तहसीलदार चिखली यांच्या स्तरावर प्रलंबित असलेल्या सर्व प्रकारच्या महसुली दाव्यांचा निपटारा करण्यासाठी जिल्हाधिकारी कार्यालयाकडून पुढील प्रमाणे अधिकृत वेळापत्रक निश्चित करण्यात आले आहे.
या अभियानांतर्गत बुलढाणा जिल्ह्यामध्ये मंडळ स्तर, तहसील स्तर, उपविभाग स्तर तसेच जिल्हास्तरावर आयोजित केल्या जाणाऱ्या महसूल लोक अदालतींचे सविस्तर वेळापत्रक निश्चित करण्यात आले आहे.
महसूल लोक अदालतींचे अधिकृत वेळापत्रक (बुलढाणा जिल्हा)
चिखली तालुक्यातील विविध महसूल स्तरांनुसार लोक अदालती खालील तारखांना सकाळी १०.०० वाजल्यापासून संबंधित मुख्यालयाच्या ठिकाणी आयोजित केल्या जातील:
अ. क्र. महसूल स्तर / न्यायालय सत्र १ (सप्टेंबर-ऑक्टोबर २०२६) सत्र २ (डिसेंबर २०२६) सत्र ३ (मार्च २०२७)
१ मंडळ स्तर (मंडळ अधिकारी कार्यालय) २४ सप्टेंबर २०२६ (गुरुवार) ३ डिसेंबर २०२६ (गुरुवार) ४ मार्च २०२७ (गुरुवार)
२ तहसील स्तर (तहसीलदार/नायब तहसीलदार कार्यालय) १ ऑक्टोबर २०२६ (गुरुवार) १० डिसेंबर २०२६ (गुरुवार) ११ मार्च २०२७ (गुरुवार)
(टीप: पक्षकारांनी लोक अदालतीच्या दिनांकापूर्वी संबंधित कार्यालयात जाऊन पूर्वतयारी व तडजोड अर्ज सादर करावयाचा आहे.)
कोणत्या प्रकरणांचा समावेश असेल?
महाराष्ट्र जमीन महसूल संहिता, १९६६ अन्वये फेरफार वाद व हक्क नोंद तक्रारी (विवादित फेरफार प्रकरणे).
रस्त्याचे वाद (कलम १४३), शेतातील पांदण रस्ते / वहिवाट व बांधावरून जाणाऱ्या रस्त्यांचे वाद.
पाणी वहिवाटीचे व शिवरस्त्यांचे तंटे.
मंडळ अधिकारी, नायब तहसीलदार व तहसीलदार यांच्या न्यायालयात प्रलंबित असणारी विविध महसुली अपीले व पुनरीक्षण प्रकरणे.
विहित नमुन्यात अर्ज कसा करावा? (“प्रपत्र-अ”)
ज्या पक्षकारांचे महसुली दावे मंडळ अधिकारी अथवा तहसील कार्यालयात प्रलंबित आहेत, त्यांनी शासनाने विहित केलेल्या “प्रपत्र-अ” मधील नमुन्यात तडजोड अर्ज सादर करावयाचा आहे. सदर अर्जामध्ये दोन्ही पक्षकार किंवा त्यांचे वकील यांच्या स्वाक्षरीसह तडजोडीची सहमती दर्शविणे आवश्यक आहे.
अर्जाचा नमुना (“प्रपत्र-अ”): तहसील कार्यालय चिखली (न्यायालयीन शाखा), तालुक्यातील सर्व मंडळ अधिकारी व तलाठी कार्यालयांत विनामूल्य उपलब्ध आहे.
नागरिकांना व पक्षकारांना जाहीर आवाहन करण्यात येते की
वर्षानुवर्षे न्यायालयात दावे सुरू राहिल्याने दोन्ही बाजूंचा मोठा आर्थिक खर्च होतो, तसेच कटुता वाढते. महसूल लोक अदालतीमध्ये दोन्ही पक्षांच्या सहमतीने एकाच दिवशी कायमस्वरूपी व सामंजस्याने तोडगा निघतो आणि या आदेशाविरुद्ध वरिष्ठ न्यायालयात अपील उद्भवत नाही.
तरी चिखली तालुक्यातील सर्व शेतकरी, खातेदार, पक्षकार व वकील बंधू-भगिनींनी आपल्या संबंधित मंडळ व तहसील स्तरावरील तारखांची नोंद घेऊन या सुवर्णसंधीचा जास्तीत जास्त लाभ घ्यावा व आपली प्रलंबित प्रकरणे सामंजस्याने निकाली काढावीत, असे आवाहन तहसीलदार तथा तालुका दंडाधिकारी विजय सवडे यांनी केले आहे.