कीर्ती कुचेरिया यांच्या मरणोत्तर नेत्रदानाने दोन अंध व्यक्तींच्या जीवनात प्रकाश; कुचेरिया व दुगड परिवाराचा आदर्श निर्णय
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा:लोणार येथील रहिवासी आणि देऊळगाव राजा येथील प्रतिष्ठित व्यापारी गौतम दुगड यांच्या नातेवाईक सौ. कीर्ती प्रवीणकुमार कुचेरिया यांचे अल्पशा आजाराने दुःखद निधन झाले. या अतीव दुःखाच्या प्रसंगातही कुचेरिया आणि दुगड परिवाराने सामाजिक भान जपत मरणोत्तर नेत्रदानाचा एक अत्यंत कौतुकास्पद आणि आदर्श निर्णय घेतला. त्यांच्या या निर्णयामुळे भविष्यात दोन अंध व्यक्तींना हे सुंदर जग पाहण्याची नवी दृष्टी मिळणार आहे.
सौ. कीर्ती कुचेरिया यांच्या निधनानंतर, त्यांच्या कौटुंबिक सदस्यांनी दुःख बाजूला सारून समाजाप्रती आपले कर्तव्य निभावण्याचे ठरवले. त्यांनी तातडीने जायंट्स परिवाराचे डॉ. अशोक काबरा यांच्याशी संपर्क साधला. डॉ. काबरा यांच्या मार्गदर्शनाखाली आणि समन्वयाने, जालना येथील सुप्रसिद्ध गणपती नेत्रालयाच्या वैद्यकीय चमूने देऊळगाव राजा येथे येऊन मरणोत्तर नेत्रदानाची प्रक्रिया अत्यंत सुलभतेने पार पाडली.
दुःखाच्या डोंगराखाली दबलेले असतानाही कुचेरिया परिवाराने घेतलेल्या या धाडसी व दातृत्वपूर्ण निर्णयाचे सर्व स्तरातून कौतुक होत आहे. त्यांनी घेतलेला हा निर्णय समाजासमोर एक मोठा आदर्श निर्माण करणारा ठरला असून, नेत्रदानाचे महत्त्व अधोरेखित करतो. दिवंगत सौ. कीर्ती कुचेरिया यांच्या पश्चात पती, एक मुलगा आणि एक मुलगी असा मोठा आप्तपरिवार आहे.
