जुन्या जागेवर बसस्थानकाची मागणी; झाडांच्या छाटणीचाही मुद्दा
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा : देऊळगाव मही येथील बसस्थानकाचा प्रश्न पुन्हा चर्चेत आला आहे. देऊळगाव राजा–चिखली मार्गावरील खडकपूर्णा हॉटेलपासून खडकपूर्णा नदीच्या पुलाच्या उत्तरेकडील बाजूस काही अंतरावर रस्त्याला वळण आहे. हे वळण कमी करण्याच्या दृष्टीने संबंधित विभागाकडून पर्यायी मार्ग तयार करण्यात आला असून, त्यामुळे जुना मार्ग सध्या वापरात नसल्याचे स्थानिकांकडून सांगण्यात येत आहे.
जुन्या मार्गालगत उपलब्ध असलेल्या शासकीय जागेचा सार्वजनिक उपयोग करून त्या ठिकाणी देऊळगाव महीसाठी बसस्थानकाची सुविधा निर्माण करता येईल का, याबाबत स्थानिक पातळीवर चर्चा सुरू झाली आहे. बसस्थानकासाठी जागेची उपलब्धता, वाहतुकीची सुरक्षितता, तांत्रिक बाबी आणि अन्य आवश्यक निकषांची संबंधित विभागाने पाहणी करून निर्णय घ्यावा, अशी मागणी पुढे येत आहे.
या परिसरालगत असलेल्या काही शेतकऱ्यांनीही त्या ठिकाणी बसस्थानक व्हावे, या भूमिकेला सहमती दर्शविल्याचे सांगण्यात येत आहे. संबंधित शेतकऱ्यांचे एकमत झाल्यास या मागणीला पुढील स्वरूप देण्यासाठी प्रयत्न करता येतील. शेतकऱ्यांचे एकमत झाल्यास या विषयासाठी पुढाकार घेऊन आवश्यक सहकार्य करण्याची तयारी भाजप कार्यकर्ते गणेश नागरे यांनी व्यक्त केली आहे.
देऊळगाव मही येथे बसस्थानकाची सुविधा उपलब्ध झाल्यास प्रवाशांची होणारी गैरसोय कमी होण्यास मदत होऊ शकते. तसेच उपलब्ध शासकीय जागेचा सार्वजनिक उपयोग होण्यासोबतच प्रवाशांसाठी आवश्यक सुविधा निर्माण होण्याची आणि परिसरात लघु व्यवसायांना संधी मिळण्याची शक्यता आहे.
दरम्यान, देऊळगाव राजा–चिखली मार्गावरील दुभाजकासह काही ठिकाणी रस्त्याच्या कडेला झाडांच्या फांद्या वाढल्या आहेत. या फांद्यांमुळे वाहनचालकांना अडथळा निर्माण होऊन अपघाताची शक्यता असल्याचा मुद्दा गणेश नागरे यांनी उपस्थित केला आहे. या मार्गावर अलीकडील काळात अपघातांच्या घटना घडल्याचे निदर्शनास आल्याचे सांगत, संभाव्य धोका टाळण्यासाठी संबंधित विभागाने रस्त्यालगतच्या झाडांची पाहणी करून आवश्यक त्या ठिकाणी नियमानुसार छाटणी करावी, अशी मागणी त्यांनी केली आहे.
बसस्थानकासाठी उपलब्ध जागेची पाहणी, स्थानिक शेतकऱ्यांची भूमिका तसेच रस्त्यालगतच्या झाडांच्या छाटणीबाबत संबंधित विभागाने प्रत्यक्ष पाहणी करून नियमानुसार आवश्यक कार्यवाही करावी, अशी अपेक्षा स्थानिक नागरिकांकडून व्यक्त होत आहे.
