देऊळगाव राजा बस स्थानक चौकात भीषण अपघात; रॉंग साईडने आलेली दुचाकी बसखाली, चालक गंभीर जखमी!
नागपूर-संभाजीनगर बसचा देऊळगाव राजात थरार; दुचाकीस्वार थेट टायरखाली अडकला, प्रकृती चिंताजनक.
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा:नागपूरवरून छत्रपती संभाजीनगरकडे जाणाऱ्या बसचा देऊळगाव राजा शहरात आज एक भीषण अपघात झाला. बसस्थानकात प्रवेश करत असताना अचानक चुकीच्या बाजूने (रॉंग साईडने) आलेल्या दुचाकीस्वाराला बसने जोरदार धडक दिली. या अपघातात दुचाकीस्वार बसच्या टायरखाली अडकल्याने त्याला गंभीर दुखापत झाली असून त्याची प्रकृती अत्यंत चिंताजनक आहे.
मिळालेल्या माहितीनुसार, नागपूर ते छत्रपती संभाजीनगर अशी धावणारी बस प्रवाशांना सोडण्यासाठी देऊळगाव राजा येथील बस स्थानकात वळत होती. याच दरम्यान, एक दुचाकी चालक अचानक चुकीच्या दिशेने (रॉंग साईडने) थेट बसच्या समोर आला. बस चालकाने गाडी थांबवण्याचा प्रयत्न केला, मात्र दुचाकी थेट चालकासह बसच्या खाली घुसली. अपघात एवढा भीषण होता की दुचाकीस्वार युवक थेट बसच्या आत टायरच्या खाली अडकला गेला.
नागरिकांचे तातडीने बचावकार्य
अपघात घडताच परिसरातील स्थानिक नागरिक आणि प्रवाशांनी घटनास्थळी मोठी धाव घेतली. अत्यंत शिताफीने टायरखाली अडकलेल्या जखमी युवकाला बाहेर काढण्यात आले. अपघातग्रस्त युवक नागेश (राहणार – जालना) हा या घटनेत अत्यंत रक्तबंबाळ अवस्थेत होता. त्याच्या डोक्याला आणि तोंडाला गंभीर मार लागल्याने त्याला नागरिकांनी तात्काळ देऊळगाव राजा येथील ग्रामीण रुग्णालयात उपचारासाठी दाखल केले.
जालना येथे तातडीने हलवले; प्रकृती चिंताजनक
ग्रामीण रुग्णालयातील वैद्यकीय अधिकाऱ्यांनी जखमी नागेश याच्यावर तातडीने प्राथमिक उपचार सुरू केले. मात्र, त्याच्या डोक्याला अतिशय गंभीर आणि खोलवर मार लागल्यामुळे त्याच्यावर तातडीने मोठ्या रुग्णालयात शस्त्रक्रिया (सर्जरी) करण्याची अत्यंत आवश्यकता असल्याचे डॉक्टरांनी सांगितले. त्यानुसार जखमी नागेश याला अधिक उपचारासाठी देऊळगाव राजा ग्रामीण रुग्णालयातून तातडीने जालना येथील मोठ्या रुग्णालयात हलवण्यात आले आहे. सरकारी डॉक्टरांनी दिलेल्या माहितीनुसार, अपघातातील जखमी युवकाची प्रकृती सध्या अतिशय चिंताजनक आहे. या अपघातामुळे बसस्थानक परिसरात काही काळ तणावाचे वातावरण निर्माण झाले होते.
