‘नाथाभाऊ 75’चा अनोखा जागर; जे. ई. स्कूलमध्ये १ हजार विद्यार्थ्यांची भव्य मानवी साखळी
१०० शिक्षक-शिक्षिकांचा सक्रिय सहभाग; शिस्तबद्ध आयोजनाने वेधले नागरिकांचे लक्ष
मुक्ताईनगर (प्रतिनिधी) : ज्येष्ठ नेते तथा आमदार एकनाथराव खडसे यांच्या अमृतमहोत्सवी वर्षानिमित्त मुक्ताईनगर येथील जे. ई. स्कूल आणि ज्युनिअर कॉलेजच्या वतीने अनोख्या उपक्रमाचे आयोजन करण्यात आले. विद्यालयाच्या विस्तीर्ण मैदानावर तब्बल १ हजार विद्यार्थी आणि १०० शिक्षक-शिक्षिकांनी एकत्र येत ‘J E SCHOOL, नाथाभाऊ @75’ अशी भव्य मानवी साखळी साकारली.
विद्यार्थ्यांनी सामूहिक कवायती आणि अत्यंत शिस्तबद्ध पद्धतीने केलेली रचना उपस्थितांचे लक्ष वेधून घेत होती. मानवी साखळीच्या माध्यमातून विद्यार्थ्यांनी आमदार एकनाथराव खडसे यांच्या ७५व्या वाढदिवसानिमित्त शुभेच्छा व्यक्त केल्या. मोठ्या संख्येने विद्यार्थी आणि शिक्षकांचा सहभाग असल्याने विद्यालयाच्या परिसरात उत्साहाचे वातावरण निर्माण झाले होते.
या उपक्रमाला संस्थेच्या अध्यक्षा ॲड. रोहिणी खडसे तसेच सौ. शारदाताई खडसे चौधरी यांची उपस्थिती लाभली. मैदानावर साकारलेली भव्य मानवी साखळी पाहून त्यांनी विद्यार्थ्यांच्या शिस्तीचे आणि उपक्रमातील सहभागाचे कौतुक केले.
यावेळी ॲड. रोहिणी खडसे यांनी विद्यार्थ्यांमधील शिस्त, उत्साह आणि सहभाग पाहून समाधान व्यक्त केले. शिक्षण क्षेत्राशी संबंधित उपक्रमांमध्ये विद्यार्थ्यांनी अशा प्रकारे एकत्रित सहभाग नोंदविणे ही सकारात्मक बाब असल्याचे त्यांनी सांगितले. या उपक्रमासाठी सहभागी विद्यार्थी, शिक्षक-शिक्षिका आणि विद्यालयातील कर्मचाऱ्यांचे त्यांनी अभिनंदन केले.
शिस्तबद्ध आयोजन ठरले आकर्षण
या संपूर्ण उपक्रमाचे वैशिष्ट्य म्हणजे मोठ्या संख्येने सहभागी झालेल्या विद्यार्थ्यांची शिस्तबद्ध रचना. मैदानावर विद्यार्थ्यांना अपेक्षित आकारात उभे करण्यापासून ते सामूहिक कवायतीपर्यंत शिक्षकांनी नियोजनबद्ध पद्धतीने जबाबदारी पार पाडली. त्यामुळे ‘नाथाभाऊ @75’ ही अक्षररचना स्पष्टपणे दिसून आली.
उपक्रमाच्या यशस्वी आयोजनासाठी विद्यालयाचे प्राचार्य व्ही. एम. चौधरी, क्रीडा व कला शिक्षकांसह सर्व शिक्षक-शिक्षिका आणि शिक्षकेतर कर्मचाऱ्यांनी विशेष परिश्रम घेतले. विद्यार्थ्यांची रचना, शिस्त आणि संपूर्ण कार्यक्रमाचे नियोजन यासाठी शिक्षकांनी मैदानावर सक्रिय भूमिका बजावली.
पालक, नागरिकांचीही उपस्थिती
या आगळ्यावेगळ्या उपक्रमाचे दृश्य पाहण्यासाठी पालक आणि स्थानिक नागरिकांनीही विद्यालयाच्या परिसरात गर्दी केली होती. एकाच वेळी १ हजार विद्यार्थ्यांनी साकारलेली मानवी साखळी आणि त्यामागील नियोजन यामुळे हा उपक्रम परिसरात चर्चेचा विषय ठरला.
विद्यार्थ्यांच्या सामूहिक सहभागातून साकारलेली ही मानवी साखळी केवळ वाढदिवसाच्या शुभेच्छांपुरती मर्यादित न राहता शिस्त, संघभावना आणि सामूहिक सहभागाचे दर्शन घडविणारा उपक्रम ठरल्याची भावना उपस्थितांमधून व्यक्त झाली.
