देऊळगाव राजा शहरात दामिनी पथकाची धडक कारवाई; छेडछाड करणाऱ्या टवाळखोरांना चोप देत मुलींना दिले स्वसंरक्षणाचे धडे
स्टार भारत लाईव्ह एक्सप्रेस
प्रतिनिधी ;– शंकर शिवरकर
देऊळगाव राजा:पोलीस अधीक्षक नीलेश तांबे यांच्या आदेशानुसार आणि उपविभागीय पोलीस अधिकारी अर्जुन ठोसरे यांच्या मार्गदर्शनाखाली देऊळगाव राजा शहरात दामिनी पथकाने विशेष मोहीम राबवून टवाळखोरांवर मोठी कारवाई केली आहे. या कारवाईमुळे शाळा, कॉलेज आणि कामानिमित्त बाहेर पडणाऱ्या महिला व मुलींसाठी शहरात सुरक्षित आणि भयमुक्त वातावरण निर्माण झाले आहे.
मुख्य ठिकाणी गस्त आणि टवाळखोरांना चोप
दामिनी पथकाच्या प्रमुख पोलीस अंमलदार जयश्री काकडे आणि महिला पोलीस अंमलदार वर्षा शिंदे यांनी शहरातील गर्दीच्या आणि संवेदनशील भागात अचानक तपासणी सुरू केली.
यामध्ये प्रामुख्याने: खोरेश्वर महादेव मंदिर व बालाजी महाराज मंदिर परिसर
मुख्य बाजारपेठ आणि बस स्थानक परिसर
खासगी ट्युशन क्लासेस, शाळा आणि कॉलेज परिसर
या सार्वजनिक ठिकाणी विनाकारण घिरट्या घालणाऱ्या आणि मुलींची छेडछाड करणाऱ्या टवाळखोरांना पथकाने पकडून चांगलाच चोप दिला. त्यानंतर त्यांच्या पालकांना पोलीस ठाण्यात बोलवून, त्यांच्यासमोरच टवाळखोरांना कडक समज देऊन सोडण्यात आले.
बस स्थानकावर मुलींना स्वसंरक्षणाचे धडे
कारवाईसोबतच दामिनी पथकाने देऊळगाव राजा बस स्थानक येथे मुलींशी थेट संवाद साधला. यावेळी जयश्री काकडे आणि वर्षा शिंदे यांनी मुलींना स्वतःचे संरक्षण कसे करावे, छेडछाड करणाऱ्यांना कसा धडा शिकवावा आणि ‘चिडीमार’ प्रवृत्तीचा सामना कसा करावा, याचे प्रत्यक्ष प्रात्यक्षिकांसह मार्गदर्शन व प्रशिक्षण दिले.
चौकाचौकांत बंदोबस्त; नागरिक व महिलांमध्ये आनंदाचे वातावरण
दामिनी पथकाच्या या धडक आणि सातत्यपूर्ण कारवाईमुळे सध्या शहरातील प्रमुख चौकाचौकांत पोलिसांचा चोख बंदोबस्त दिसून येत आहे. पथकाच्या या कामगिरीमुळे छेडछाडीचे प्रकार थांबले असून, महिला आणि विद्यार्थिनींमध्ये सुरक्षेची भावना निर्माण झाली आहे. पोलीस प्रशासनाच्या या भूमिकेबद्दल शहरातील नागरिक आणि पालकांमधून समाधान व्यक्त केले जात आहे.
