खिर्डीसह परिसरात अवैध धंद्यांना उधाण – प्रशासनाचे दुर्लक्ष?
स्टार भारत लाईव्ह एक्सप्रेस
रावेर ता : प्रतिनिधी . विनोद तायडे
खिर्डी व आसपासच्या ग्रामीण भागात सध्या अवैध धंद्यांना मोठ्या प्रमाणावर उधाण आले असून स्थानिक नागरिकांमध्ये भीतीचे वातावरण निर्माण झाले आहे. गावातील काही ठिकाणी खुलेआम अवैध दारू विक्री, मटका-जुगार अड्डे तसेच इतर बेकायदेशीर व्यवहार सुरू असल्याची माहिती समोर येत आहे. विशेष म्हणजे हे सर्व प्रकार प्रशासनाच्या नजरेसमोरच सुरू असल्याचा आरोप नागरिकांकडून केला जात आहे.
स्थानिकांच्या मते, सायंकाळनंतर या अवैध धंद्यांची तीव्रता अधिक वाढते. काही ठिकाणी बाहेरील व्यक्तींचीही वर्दळ वाढली असून त्यामुळे कायदा व सुव्यवस्थेचा प्रश्न निर्माण होण्याची शक्यता व्यक्त केली जात आहे. युवक वर्ग या गैरप्रकारांकडे आकर्षित होत असल्याने त्यांच्या भविष्यावरही विपरीत परिणाम होत असल्याची चिंता व्यक्त केली जात आहे.
ग्रामस्थांनी अनेक वेळा संबंधित विभागाकडे तक्रारी केल्या असल्या तरी अद्याप ठोस कारवाई होत नसल्याने संताप व्यक्त केला जात आहे. “पोलीस प्रशासनाने तात्काळ लक्ष देऊन या अवैध धंद्यांवर आळा घालावा, अन्यथा आंदोलनाचा मार्ग अवलंबावा लागेल,” असा इशारा काही नागरिकांनी दिला आहे.
दरम्यान, या प्रकरणात संबंधित प्रशासनाने गांभीर्याने दखल घेऊन दोषींवर कडक कारवाई करावी आणि परिसरात पुन्हा शांतता व सुरक्षितता निर्माण करावी, अशी मागणी सर्व स्तरांतून होत आहे.
