अवैध दारूविरोधात मुक्ताईनगर पोलिसांचा कडक पवित्रासायंकाळी ५ वाजता घोडसगाव परिसरात महत्त्वाची कारवाई करण्यात आली.
मुक्ताईनगर | संपादकीय
समाजाच्या आरोग्यास व सुरक्षिततेस धोका ठरणाऱ्या अवैध दारूविक्रीवर आळा घालण्यासाठी मुक्ताईनगर पोलीस स्टेशनच्या वतीने सातत्याने कारवाई सुरू असून, याचाच एक भाग म्हणून दिनांक १६ डिसेंबर २०२५ रोजी सायंकाळी ५ वाजता घोडसगाव परिसरात महत्त्वाची कारवाई करण्यात आली.
महाराष्ट्र दारूबंदी कायदा कलम ६५ (ई) अंतर्गत दाखल करण्यात आलेल्या या प्रकरणात विलास आत्माराम न्हावकर (वय ५०, रा. घोडसगाव, ता. मुक्ताईनगर) याला ताब्यात घेण्यात आले. आरोपीकडून ३५ लिटर क्षमतेच्या प्लास्टिक कॅनमध्ये ३० लिटर हातभट्टीची तयार दारू जप्त करण्यात आली असून, जप्त मालाची अंदाजे किंमत ३,००० रुपये आहे.
विशेष म्हणजे, ही कारवाई मुक्ताईनगर पोलीस स्टेशनचे पोलीस निरीक्षक आशिष आडसूळ यांच्या मार्गदर्शनाखाली पार पडली. प्रत्यक्ष कारवाईत पोलीस कॉन्स्टेबल पवन सुरेश सपकाळ यांनी सतर्कता व कर्तव्यदक्षतेने महत्त्वाची भूमिका बजावली. फिर्यादीच्या माहितीच्या आधारे तात्काळ पंचनामा करून आरोपीविरोधात गुन्हा दाखल करण्यात आला.
ग्रामीण भागात अवैध दारूविक्रीमुळे अनेक सामाजिक समस्या निर्माण होत असून, तरुण पिढीचे आरोग्य धोक्यात येत आहे. अशा परिस्थितीत मुक्ताईनगर पोलिसांनी उचललेले हे ठोस पाऊल निश्चितच कौतुकास्पद आहे. कायद्याचा धाक कायम ठेवत, समाजहितासाठी अशा कारवाया अधिक तीव्र करण्याची गरज असल्याचे मत नागरिकांतून व्यक्त होत आहे.
पोलीस निरीक्षक आशिष आडसूळ यांच्या नेतृत्वाखाली मुक्ताईनगर पोलीस स्टेशनकडून अवैध धंद्यांविरोधात कठोर भूमिका कायम राहणार असून, कायदा मोडणाऱ्यांवर कोणतीही तडजोड न करता कारवाई केली जाईल, असा स्पष्ट संदेश या कारवाईतून देण्यात आला आहे.
