मुक्ताईनगर नगरपंचायत निवडणूक २०२५ : प्रभाग आरक्षण निश्चित — प्रभाग क्र. ८ अनुसूचित जातीसाठी राखीव; चेतन झनके यांच्या कडून उमेदवारीची जोरदार तयारी

मुक्ताईनगर (प्रतिनिधी)

मुक्ताईनगर नगरपंचायतीच्या २०२५ मधील सार्वत्रिक निवडणुकीच्या पार्श्वभूमीवर बुधवारी (दि. ८ ऑक्टोबर) झालेल्या प्रभागनिहाय आरक्षण सोडतीने राजकीय वातावरण तापले आहे. या सोडतीत शहरातील प्रभाग क्र. ८ हा अनुसूचित जाती (SC) प्रवर्गासाठी राखीव ठरला असून, या प्रभागातून सामाजिक कार्यकर्ते चेतन झनके यांच्या उमेदवारीच्या चर्चेला जोर आला आहे.

छत्रपती शिवाजी महाराज नाट्यगृह सभागृहात दुपारी पार पडलेल्या या आरक्षण सोडतीत भुसावळचे उपविभागीय अधिकारी जितेंद्र पाटील, तहसीलदार गिरीश वखारे आणि नगरपंचायतीचे मुख्याधिकारी सुभाष जानोरे यांच्या उपस्थितीत ईश्वर चिठ्ठी पद्धतीने शहरातील १७ प्रभागांचे आरक्षण निश्चित करण्यात आले.

🔹 प्रभाग क्र. ८ अनुसूचित जातीसाठी राखीव — चेतन रवींद्र झनके यांचा दावा अधिक बळकट

प्रभाग क्र. ८ अनुसूचित जातीसाठी आरक्षित ठरल्याने या प्रभागातील निवडणुकीत नवीन समीकरणे तयार झाली आहेत. या भागातील तरुण आणि सामाजिक जाण असलेले चेतन रवींद्र झनके हे गेल्या काही वर्षांपासून स्थानिक विकास कामांमध्ये सक्रिय आहेत. त्यांनी परिसरात शेतकऱ्यांचे, विद्यार्थ्यांचे व सामान्य नागरिकांचे प्रश्न सातत्याने पुढे आणले असून, त्यांच्या कार्यशैलीमुळे प्रभागात त्यांना मजबूत जनाधार मिळाला आहे.

चेतन रवींद्र झनके यांनी आरक्षण जाहीर झाल्यानंतर माध्यमांशी बोलताना सांगितले की,

“हा प्रभाग अनुसूचित जातीसाठी आरक्षित झाल्यामुळे समाजातील प्रतिनिधित्वाची संधी मिळाली आहे. मी जनतेच्या विकासासाठी प्रामाणिकपणे काम करण्यास तयार आहे,”
असे ते म्हणाले.

🔹 प्रभाग आरक्षणाचा राजकीय अर्थ

या आरक्षण सोडतीत एकूण १७ प्रभागांपैकी ६ प्रभाग सर्वसाधारण महिलांसाठी, तर ५ प्रभाग नागरिकांचा मागास प्रवर्ग (OBC) साठी राखीव झाले आहेत. त्यापैकी प्रभाग ८ हा अनुसूचित जाती (SC) साठी राखीव असल्याने मुक्ताईनगरमधील पारंपरिक राजकीय समीकरणांना नवी कलाटणी मिळण्याची शक्यता आहे.

या पार्श्वभूमीवर काँग्रेस, भाजप, राष्ट्रवादी आणि मनसे यांसह स्थानिक पातळीवरील अपक्ष इच्छुक आता नव्या गणितात बसण्याचा प्रयत्न करत आहेत.

🔹 निवडणुकीची रणधुमाळी सुरु

प्रभागनिहाय आरक्षण जाहीर झाल्यामुळे आता सर्वच राजकीय पक्षांनी आपल्या उमेदवार निवडीच्या प्रक्रियेला वेग दिला आहे. नागरिकांच्या आणि पक्ष कार्यकर्त्यांच्या चर्चेत “प्रभाग ८ मध्ये चेतन झनके यांना प्रचंड प्रतिसाद मिळत आहे” असे बोलले जात आहे.