स्पेलिंग बी’ स्पर्धेत मुक्ताईनगरच्या जि. प. उर्दू शाळेच्या विद्यार्थ्यांचे घवघवीत यश; ढोल-ताशांच्या गजरात निघाली विजयी मिरवणूक

​मुक्ताईनगर (प्रतिनिधी):
तालुका आणि जिल्हास्तरावर आयोजित ‘स्पेलिंग बी’ इंग्रजी शब्दलेखन स्पर्धेत मुक्ताईनगर येथील जिल्हा परिषद उर्दू मुलांची शाळा क्र. २ च्या विद्यार्थ्यांनी उत्कृष्ट कामगिरी करत घवघवीत यश संपादन केले. या स्पर्धेत तालुका स्तरावर गट क्र. २ मध्ये असद अली सलमान अली याने प्रथम क्रमांक, गट क्र. ३ मध्ये कामिल शेख इमरान याने प्रथम क्रमांक तर उझैर शेख आरिफ याने द्वितीय क्रमांक पटकावला. तसेच गट क्र. ४ मध्ये उमर शेख आरिफ याने तृतीय क्रमांक पटकावला. यासोबतच उमर शेख आरिफ याने जिल्हास्तरावरही उल्लेखनीय यश मिळवून शाळेचे व मुक्ताईनगरचे नाव संपूर्ण जिल्ह्यात उज्ज्वल केले.
​या ऐतिहासिक यशाबद्दल शाळेतील या यशस्वी चार विद्यार्थ्यांचे कौतुक करण्यासाठी, त्यांची पाठ थोपटण्यासाठी आणि भविष्यात इतर विद्यार्थ्यांनाही यातून प्रेरणा मिळावी यासाठी शाळा, शाळा व्यवस्थापन समिती, सर्व नगरसेवक व गावकऱ्यांच्या वतीने एका भव्य गौरव सोहळ्याचे आयोजन करण्यात आले होते. या कार्यक्रमात गुणवंत विद्यार्थ्यांना मान्यवरांच्या हस्ते ट्रॉफी, मेडल, अभ्यासपूरक पुस्तके, स्टडी टेबल आणि फुटबॉल अशी विविध शैक्षणिक व क्रीडा भेटवस्तूंची बक्षिसे देऊन सन्मानित करण्यात आले.
​या सोहळ्यास प्रमुख अतिथी म्हणून मुक्ताईनगर तालुक्याचे गटशिक्षणाधिकारी (BEO) आदरणीय वसंत मोरे साहेब, पोलीस उपनिरीक्षक तुषारजी पाटील साहेब, हकीम चौधरी साहेब, शकील खाटीक सर, नगरसेवक मुशीर मनियार, नगरसेवक रिझवान शेख मस्तान कुरेशी, नगरसेवक लुकमान शेठ आणि ‘लोकमत’चे पत्रकार मतीन शेख साहेब उपस्थित होते.
​याप्रसंगी आपले मनोगत व्यक्त करताना गटशिक्षणाधिकारी वसंत मोरे साहेब, पोलीस उपनिरीक्षक तुषारजी पाटील साहेब, हकीम चौधरी साहेब आणि शकील खाटीक सर यांनी कार्यक्रमाचे व शाळेचे तोंडभरून कौतुक केले. ते म्हणाले, “एका जिल्हा परिषद शाळेने विद्यार्थ्यांचा उत्साह व आत्मविश्वास वाढवण्यासाठी इतक्या मोठ्या प्रमाणावर भव्य कार्यक्रम आयोजित केला, ही अत्यंत कौतुकास्पद व आनंददायी बाब आहे. या गौरव सोहळ्यामुळे केवळ विजेत्यांचाच नव्हे तर इतर सर्व विद्यार्थ्यांमध्येही अभ्यासाची गोडी व मोठी प्रेरणा निर्माण होईल. शासकीय शाळेचा हा उपक्रम समाजासाठी दिशादर्शक आहे,” अशा शब्दांत मान्यवरांनी आयोजनाची प्रशंसा केली.
​सदर कार्यक्रमास शाळेचे मुख्याध्यापक शरीफ मोईउद्दीन बागवान, शाळेतील सर्व शिक्षकवृंद तसेच स्थानिक नगरसेवक व मान्यवर मोठ्या संख्येने उपस्थित होते. कार्यक्रमाच्या यशस्वी आयोजनासाठी शाळा व्यवस्थापन समितीचे अध्यक्ष अकील शेख, उपाध्यक्ष आजम शेख, सदस्य तस्लीम शाह, सदस्य सरफराज मनियार, सदस्य अकील मनियार, सदस्य हकीम मनियार आणि गावकऱ्यांनी विशेष परिश्रम घेतले.
​सत्काराच्या कार्यक्रमानंतर यशस्वी विद्यार्थ्यांची सजवलेल्या गाडीतून संपूर्ण गावात ढोल-ताशांच्या गजरात भव्य मिरवणूक काढण्यात आली. गावकऱ्यांनी विद्यार्थ्यांवर कौतुकाचा वर्षाव केला. या अभूतपूर्व मान-सन्मानामुळे संपूर्ण परिसरात शाळेचे व विद्यार्थ्यांचे मोठे कौतुक होत आहे.