येथे व्यापाऱ्याची ८ लाखांची लूट उघड; ७ संशयित जेरबंद

स्टार भारत लाईव्ह एक्सप्रेस | शहर प्रतिनिधी – विकास आमोदकर

येथील मसाला व्यापाऱ्याची चालती गाडी अडवून सुमारे ८ लाख रुपयांची रोकड असलेली बॅग लुटणाऱ्या सात संशयित आरोपींना रावेर गुन्हे शोध पथकाने अटक केली आहे. या कारवाईमुळे परिसरात खळबळ उडाली असून मुख्य आरोपी मात्र अद्याप फरार आहे.

घटना काय?

दि. ०६ फेब्रुवारी २०२६ रोजी बुऱ्हाणपूर येथील व्यापारी दीपक सुरेश धर्माणी यांनी त्यांच्या दुकानातील कर्मचारी गौरव वाघ व तहसीद तेली यांना नेहमीप्रमाणे सावदा, फैजपूर व रावेर परिसरात वसुलीसाठी पाठविले होते. दिवसभराची वसुली करून परत येत असताना खानापूर आरटीओजवळ रात्री सुमारे ९ वाजता ८ ते ९ जणांनी दुचाकीवरून त्यांची गाडी अडवून पैशांची बॅग हिसकावून नेल्याची माहिती कर्मचाऱ्यांनी फोनद्वारे दिली.

याप्रकरणी दि. ०७/०२/२०२६ रोजी येथे गु.र.नं. ५२/२०२६ भा.न्या.सं. कलम ३१६(२), ३(५), ३१०(२) अन्वये गुन्हा दाखल करण्यात आला.

तपासातील अडचणी

घटनास्थळी स्पष्ट सीसीटीव्ही फुटेज उपलब्ध नसल्याने तपासात अडचणी निर्माण झाल्या. रावेर, सावदा व फैजपूर परिसरातील तब्बल ६७ सीसीटीव्ही फुटेजची तपासणी करण्यात आली; मात्र ठोस धागेदोरे मिळत नव्हते. आरोपींनी व्यापाऱ्याच्या दिवसभराच्या हालचालींवर बारकाईने लक्ष ठेवून गुन्हा केल्याचा संशय पोलिसांना आला.

गोपनीय माहितीवरून अटक

पोलीस निरीक्षक डॉ. विशाल जैस्वाल यांना मिळालेल्या गोपनीय माहितीनुसार फारुख शेख रईस (वय १९), आत्ता उल्लाह खान दाऊद खान, सोनू शेख, शेख कादर, भुऱ्या, अक्रम खान इस्लामाईल खान (सर्व रा. बंडू चौक, रावेर) यांना ताब्यात घेऊन चौकशी केली असता त्यांनी गुन्ह्याची कबुली दिली. त्यानुसार सात जणांना अटक करण्यात आली.

या गुन्ह्यातील मुख्य आरोपी शेख हसन शेख अकचल उर्फ “फावड्या” (रा. रुस्तम चौक, रावेर) हा फरार असून त्याचा शोध सुरू आहे. त्याच्यावर यापूर्वीही विविध गुन्हे दाखल असल्याची माहिती पोलिसांनी दिली.

जप्त मुद्देमाल

आरोपींकडून आतापर्यंत:

• ₹२,५५,०००/- रोख रक्कम
• ₹९५,०००/- किंमतीच्या दोन मोटारसायकली

असा एकूण ₹३,५०,०००/- किमतीचा मुद्देमाल जप्त करण्यात आला आहे.

न्यायालयीन कार्यवाही

आरोपींना न्यायालयात हजर केले असता २६/०२/२०२६ पर्यंत पोलीस कोठडी सुनावण्यात आली आहे. पुढील तपास पोलीस उपनिरीक्षक तुषार पाटील करत आहेत.

मार्गदर्शनाखाली कारवाई

ही कारवाई पोलीस अधीक्षक श्री. महेश्वरी रेड्डी, अप्पर पोलीस अधीक्षक श्री. अशोक नखाते, पोलीस उपअधीक्षक श्री. अनिल बडगुजर, श्री. अण्णासाहेब घोलप यांच्या मार्गदर्शनाखाली करण्यात आली. गुन्हे शोध पथकासह सायबर पोलीस स्टेशनच्या अधिकाऱ्यांनी तांत्रिक मदत पुरवली.

या धाडसी कारवाईमुळे रावेर पोलिसांच्या कामगिरीचे सर्वत्र कौतुक होत आहे.