शहीद हवालदार हरिदास कापसे यांना चिखलीत शासकीय इतमामात अखेरचा निरोप; हजारो नागरिकांच्या उपस्थितीत भारतमातेच्या वीरपुत्राला भावपूर्ण श्रद्धांजली

शहीद हवालदार हरिदास कापसे यांना शासकीय इतमामात अखेरचा निरोप

चिखली प्रतिनिधी : उत्तराखंडमधील अतिउंचावरील प्रतिकूल व कठीण भौगोलिक परिस्थितीत कर्तव्य बजावत असताना ऑक्सिजनची कमतरता निर्माण झाल्याने छातीत त्रास होऊन हवालदार हरिदास मधुकर कापसे (वय ३६) यांना वीरमरण आले. त्यांच्या पार्थिवावर सोमवार, दि. १० ऑगस्ट रोजी दुपारी सुमारे १ वाजता चिखली येथील जिल्हा परिषद मैदानावर शासकीय इतमामात अत्यंत शोकाकुल वातावरणात अंत्यसंस्कार करण्यात आले.शेलसुर येथील मूळ रहिवासी असलेले हवालदार हरिदास कापसे हे चिखली शहरातील दांडगे लेआउट येथे वास्तव्यास होते. ते मूळ बॉम्बे इंजिनिअरिंग ग्रुप युनिटशी संबंधित असून सध्या ४११ कंपनी, आग्रा येथे सेवा बजावत होते. त्यांच्या वीरमरणाची बातमी समजताच चिखलीसह संपूर्ण बुलढाणा जिल्ह्यात शोककळा पसरली.पार्थिवाचे दर्शन घेण्यासाठी नागरिकांची गर्दीशहीद जवानाचे पार्थिव उत्तराखंड येथून विमानाने दिल्लीमार्गे संभाजीनगर येथे आणण्यात आले. त्यानंतर पार्थिव चिखली येथील त्यांच्या निवासस्थानी अंत्यदर्शनासाठी ठेवण्यात आले. आपल्या वीर जवानाला अखेरचे दर्शन घेण्यासाठी नागरिकांनी रस्त्याच्या दुतर्फा मोठी गर्दी केली होती.यानंतर जिल्हा परिषद मैदानावर अंत्यसंस्काराची शासकीय प्रक्रिया पार पडली. यावेळी ‘भारत माता की जय’, ‘वंदे मातरम्’, ‘शहीद वीर जवान अमर रहे’ अशा घोषणांनी परिसर दुमदुमून गेला.वीर कुटुंबीयांना तिरंगा सुपूर्दयावेळी वीरपत्नी वृषाली कापसे, वीरपिता मधुकर कापसे, बंधू ज्ञानेश्वर व ओमप्रकाश, मुलगा ऋग्वेद आणि मुलगी वैदेही यांना सैनिक अधिकाऱ्यांच्या हस्ते राष्ट्रध्वज तिरंगा सुपूर्द करण्यात आला. हा भावनिक क्षण पाहून उपस्थितांच्या डोळ्यांत अश्रू तरळले.मान्यवरांकडून श्रद्धांजलीयावेळी चिखलीच्या आमदार श्वेता महाले पाटील, बुलढाण्याचे आमदार संजय गायकवाड, शेतकरी नेते रविकांत तुपकर, शिवसेना संपर्कप्रमुख प्रा. नरेंद्र खेडेकर, माजी आमदार राहुल बोंद्रे, राज्य प्रवक्त्या ॲड. जयश्रीताई शेळके, जिल्हाप्रमुख ऋषिकेश जाधव, नगराध्यक्ष पंडितराव देशमुख, उपनगराध्यक्ष वैशालीताई खेडेकर, कपिल खेडेकर, राष्ट्रवादी काँग्रेसच्या डॉ. ज्योतीताई खेडेकर, अपर जिल्हाधिकारी सुधीर खांदे, जिल्हा सैनिक अधिकारी रूपाली सरोदे, डीवायएसपी संतोष खाडे, उपविभागीय अधिकारी राजेश पाटील, तहसीलदार विजय सवडे, गटविकास अधिकारी समाधान वाघ, चिखलीचे ठाणेदार भूषण गावंडे, अमडापूरचे ठाणेदार जयसिंग राजपूत, शेलसुरचे सरपंच सखाराम धनधर यांच्यासह विविध क्षेत्रांतील मान्यवरांनी शहीद कापसे यांना श्रद्धांजली अर्पण केली.शहीद कापसे यांचे स्मारक उभारणारयावेळी आमदार श्वेता महाले यांनी वीर जवान हरिदास कापसे यांच्या स्मृतीप्रित्यर्थ विशेष स्मारक उभारण्याचा मानस व्यक्त केला. शहीद जवानाने देशसेवेसाठी दिलेल्या सर्वोच्च बलिदानाची आठवण भावी पिढ्यांना राहावी, यासाठी त्यांच्या स्मृतीचे जतन करणे ही समाजाची आणि प्रशासनाची सामूहिक जबाबदारी असल्याचे या प्रसंगातून अधोरेखित झाले.कायदा-सुव्यवस्था राखत नागरिकांचा अभूतपूर्व सहभागशहीद जवानाला अखेरचा निरोप देण्यासाठी चिखली शहरासह तालुक्यातील हजारो नागरिकांनी जिल्हा परिषद मैदानाकडे धाव घेतली. मोठ्या संख्येने नागरिक उपस्थित असतानाही अंत्यसंस्काराची शासकीय प्रक्रिया आणि गर्दीचे नियोजन सुरळीत पार पडणे महत्त्वाचे ठरले. पोलिस प्रशासन, महसूल यंत्रणा, सैनिक अधिकारी आणि स्थानिक प्रशासन यांच्या समन्वयामुळे कायदा-सुव्यवस्था व सार्वजनिक शिस्त अबाधित ठेवत वीर जवानाला सन्मानपूर्वक अखेरचा निरोप देण्यात आला.देशाच्या सीमेवर कर्तव्य बजावताना प्राणांचे सर्वोच्च बलिदान देणाऱ्या हवालदार हरिदास कापसे यांच्या शौर्याला संपूर्ण चिखली तालुक्याने नतमस्तक होत भावपूर्ण श्रद्धांजली अर्पण केली.