मुक्ताईनगर | प्रतिनिधी
मुक्ताईनगर पोलीस स्टेशनच्या हद्दीत अवैध हातभट्टी दारू तयार व विक्री करणाऱ्यांविरोधात पोलिसांनी कठोर भूमिका घेत ठोस कारवाई केली आहे. दिनांक १५ डिसेंबर २०२५ रोजी दुपारी १२.५० वाजता चांगदेव, ता. मुक्ताईनगर येथे आरोपीच्या राहत्या घराच्या पाठीमागील बाजूस छापा टाकून ही कारवाई करण्यात आली.
मुक्ताईनगर पोलीस स्टेशनमध्ये दाखल गुन्हा रजिस्टर क्रमांक 027/2025 नुसार महाराष्ट्र दारूबंदी कायदा कलम ६५ (ई) अंतर्गत गुन्हा दाखल करण्यात आला आहे. या प्रकरणी श्रावण किशन वानखेडे (वय ६५, रा. चांगदेव, ता. मुक्ताईनगर) असे आरोपीचे नाव आहे.
पोलिसांनी दिलेल्या माहितीनुसार, आरोपीकडून ३५ लिटर क्षमतेच्या प्लास्टिक कॅनमध्ये साठवलेली हातभट्टीची तयार दारू जप्त करण्यात आली असून, तिची अंदाजे किंमत ३,५०० रुपये आहे. ही दारू विक्रीच्या उद्देशाने बाळगण्यात येत असल्याचे तपासात निष्पन्न झाले.
ही संपूर्ण कारवाई मुक्ताईनगर पोलीस स्टेशनचे पोलीस निरीक्षक आशिष अडसूळ यांच्या मार्गदर्शनाखाली करण्यात आली. प्रत्यक्ष कारवाईत पोलीस कॉन्स्टेबल व संबंधित पथकाने तत्परता दाखवत आरोपीस ताब्यात घेतले. पंचनामा करून मुद्देमाल जप्त करण्यात आला असून पुढील तपास सुरू आहे.
ग्रामीण भागात अवैध दारूविक्रीमुळे सामाजिक समस्या वाढत असल्याने अशा प्रकारांवर कठोर कारवाई सुरूच राहणार असल्याचा स्पष्ट इशारा मुक्ताईनगर पोलिसांनी दिला आहे. कायदा मोडणाऱ्यांवर कोणतीही तडजोड केली जाणार नाही, असा संदेश या कारवाईतून देण्यात आला आहे.
