रावेर तालुक्यातील दोधे येथे वृद्ध महिलेची हत्या; सालदार पोलिसांच्या ताब्यात

सोन्याच्या दागिन्यांसाठी गळा आवळल्याचा पोलिसांचा प्राथमिक तपास; काही तासांत संशयिताला ताब्यात

स्टार भारत लाईव्ह एक्सप्रेस
आवाज न्यायाचा
रावेर ता. प्रतिनिधी – विकास आमोदकर

रावेर तालुक्यातील दोधे येथे ७२ वर्षीय वृद्ध महिलेची हत्या झाल्याची धक्कादायक घटना २४ सप्टेंबर रोजी समोर आली. घरातील सदस्य बाहेर गेले असताना महिलेच्या एकटेपणाचा फायदा घेत घरात काम करणाऱ्या सालदाराने तिचा गळा आवळल्याचा प्राथमिक तपासात समोर आले आहे. या घटनेनंतर रावेर तालुक्यात खळबळ उडाली आहे.

दागिन्यांसाठी जीव घेतल्याचा संशय

पोलिसांच्या प्राथमिक माहितीनुसार, संशयित सालदाराला पैशांची गरज होती. घरातील वृद्ध महिला एकट्या असल्याची संधी साधून त्याने घरात प्रवेश केला. त्यानंतर बेल्टच्या सहाय्याने गळा आवळून महिलेची हत्या केल्याचा आरोप आहे. घटनेनंतर तिच्या अंगावरील सोन्याचे दागिने घेऊन संशयिताने तेथून जाण्याचा प्रयत्न केल्याचे वृत्त आहे.

रावेर पोलिसांची तत्काळ कारवाई

घटनेची माहिती मिळताच रावेर पोलिसांनी घटनास्थळी धाव घेत तपास सुरू केला. पोलिसांनी संशयिताची चौकशी केल्यानंतर त्याला ताब्यात घेतल्याचे वृत्त आहे. त्याच्याकडून चोरी केलेले सोन्याचे दागिनेही हस्तगत करण्यात आल्याची माहिती समोर आली आहे. प्रकरणाचा पुढील तपास रावेर पोलीस करीत आहेत.

दोधे गावात हळहळ

दिवसा घडलेल्या या घटनेमुळे दोधे परिसरात एकच खळबळ उडाली. वृद्ध महिलेच्या हत्येने ग्रामस्थांमध्ये हळहळ व्यक्त होत असून, पोलिसांकडून घटनेमागील संपूर्ण कारणांचा तपास सुरू आहे.