महाराष्ट्र राज्य परिवहन चालकावर प्राणघातक हल्ला : गुन्हेगारांची दहशत, कायदा-सुव्यवस्थेला थेट आव्हान
मुक्ताईनगर | प्रतिनिधी
महाराष्ट्र राज्य परिवहन महामंडळाच्या (एस.टी.) वाहन चालकावर अमानुष मारहाण केल्याची धक्कादायक घटना मुक्ताईनगर पोलीस स्टेशन हद्दीत घडली असून, या प्रकरणी पोलिसांनी गुन्हा दाखल केला आहे. सार्वजनिक सेवेत कार्यरत असलेल्या चालकावरच हल्ला झाल्याने परिसरात संतापाची लाट उसळली असून, कायदा व सुव्यवस्थेचा गंभीर प्रश्न निर्माण झाला आहे.
प्राप्त माहितीनुसार, दिनांक 19 डिसेंबर 2025 रोजी सायंकाळी सुमारे 7.30 ते 7.35 या वेळेत मुक्ताईनगर–सुलवाड रोडवरील आशा देवी मंदिराजवळील परिसरात ही घटना घडली. एस.टी. बस चालवत असताना चालकास अडवून काही समाजकंटकांनी शिवीगाळ करत बेदम मारहाण केली. चालकाला शासकीय काम बजावत असतानाच लक्ष्य करण्यात आल्याने ही घटना अधिक गंभीर मानली जात आहे.
या प्रकरणी मुक्ताईनगर पोलीस स्टेशनमध्ये FIR क्रमांक 0416/2025 अन्वये भारतीय न्याय संहिता (BNS) 2023 मधील कलम 132, 126(2), 350(2), 3(5) अंतर्गत गुन्हा दाखल करण्यात आला आहे. प्राथमिक तपासानुसार आरोपींनी संघटित पद्धतीने हल्ला केल्याचे निदर्शनास आले आहे.
सदर प्रकार हा केवळ एका चालकावर झालेला हल्ला नसून, शासकीय यंत्रणा, सार्वजनिक वाहतूक व्यवस्था आणि कायदा-सुव्यवस्थेवर थेट हल्ला असल्याचे स्पष्ट होत आहे. जर एस.टी.सारख्या अत्यावश्यक सेवेतील कर्मचाऱ्यांनाच सुरक्षितता नसेल, तर सर्वसामान्य नागरिकांच्या सुरक्षेचा प्रश्न ऐरणीवर येतो.
घटनेनंतर स्थानिक नागरिकांमध्ये भीतीचे वातावरण निर्माण झाले असून, आरोपींवर कठोर कारवाईची मागणी जोर धरू लागली आहे. एस.टी. कर्मचारी संघटनांनीही या घटनेचा तीव्र निषेध व्यक्त करत दोषींवर तात्काळ आणि कठोर शिक्षा देण्याची मागणी केली आहे.
दरम्यान, मुक्ताईनगर पोलीस स्टेशनचे निरीक्षक आशिष आडसूळ यांच्या मार्गदर्शनाखाली तपास सुरू असून, आरोपींचा शोध घेण्यासाठी पोलिसांची पथके रवाना करण्यात आली आहेत. कायदा हातात घेणाऱ्यांना कोणत्याही परिस्थितीत पाठीशी घातले जाणार नाही, असा इशाराही पोलिस प्रशासनाकडून देण्यात आला आहे.
ही घटना वाढत्या गुन्हेगारी प्रवृत्तीचे द्योतक असून, प्रशासनाने याची गंभीर दखल घेऊन कायदा-सुव्यवस्था अबाधित ठेवण्यासाठी कठोर पावले उचलण्याची गरज व्यक्त होत आहे.
पुढील तपास पोलीस निरीक्षक यांच्या मार्गदर्शनाखाली पोलीस हेड कॉन्स्टेबल (पोहेकॉ) चंद्रकांत बोदडे हे करीत आहेत.
