स्टार भारत लाईव्ह एक्सप्रेस
प्रतिनिधी:- मुकिंदा गव्हांदे जळगाव जामोद
नांदुरा जि. बुलढाणा ग्राहक मंचाच्या महावितरणला आदेश शेतकऱ्याला मोठा दिलासा…
नांदुरा तालुक्यातील एका शेतकऱ्याने सौर कृषी पंपासाठी अर्ज करूनही दीर्घकाळ जोडणी मिळाली नाही. त्यामुळे त्रस्त झालेल्या शेतकऱ्याने ग्राहक तक्रार निवारण मंचाकडे धाव घेतली. प्रकरणाची सुनावणी केल्यानंतर मंचाने महावितरणला संबंधित शेतकऱ्याला तीन महिन्यांच्या आत सौर कृषी पंपाची जोडणी देण्याचा आदेश दिला आहे. या निर्णयामुळे शेतकऱ्याला मोठा दिलासा मिळाला आहे.
माहितीनुसार, नांदुरा तालुक्यातील शेतकऱ्याने कुसुम योजनेअंतर्गत सौर कृषी पंपासाठी अर्ज केला होता. मात्र अनेक महिन्यांपासून प्रक्रिया प्रलंबित राहिल्याने शेतकऱ्याला शेतीसाठी पाण्याची मोठी अडचण निर्माण झाली होती. यामुळे पिकांच्या सिंचनावर परिणाम होत असल्याची तक्रार शेतकऱ्याने केली होती.
या प्रकरणात सुनावणीदरम्यान संबंधित विभागाकडून माहिती मागविण्यात आली. त्यानंतर ग्राहक मंचाने शेतकऱ्याच्या बाजूने निर्णय देत महावितरण कंपनीला तीन महिन्यांच्या आत सौर पंप जोडणी देण्याचे निर्देश दिले.
सौर कृषी पंप योजना ही शेतकऱ्यांसाठी अत्यंत उपयुक्त मानली जाते. या योजनेमुळे वीज खर्च कमी होऊन दिवसा सिंचनासाठी पाणी उपलब्ध होते, त्यामुळे अनेक शेतकरी सौर पंप योजनेकडे वळत आहेत. मात्र काही ठिकाणी प्रक्रियेत होणाऱ्या विलंबामुळे शेतकऱ्यांना अडचणींचा सामना करावा लागत आहे.
ग्राहक मंचाच्या या आदेशामुळे नांदुरा तालुक्यातील शेतकऱ्यांमध्ये समाधान व्यक्त होत असून, सरकारी योजनांची अंमलबजावणी वेळेत व्हावी अशी मागणीही शेतकरी वर्गाकडून करण्यात येत आहे…..✍️
