दहशत! देऊळगाव राजा तालुक्यात अल्पवयीन मुलीचा पाठलाग करून धमकी; भारतीय न्याय संहितेसह पोक्सोअंतर्गत गुन्हा दाखल
शाळकरी मुलीची सुरक्षा ऐरणीवर! निमगाव गुरु येथे अल्पवयीन मुलीचा पाठलाग करून धमकी देणाऱ्यावर गुन्हा दाखल
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा :तालुक्यातील निमगाव गुरु येथील शेतशिवारात एका १५ वर्षीय शाळकरी अल्पवयीन मुलीचा पाठलाग करून, तिला गंभीर स्वरूपाची धमकी दिल्याची धक्कादायक घटना उघडकीस आली आहे. याप्रकरणी पीडित मुलीच्या तक्रारीवरून देऊळगाव राजा पोलिसांनी आरोपीविरुद्ध भारतीय न्याय संहिता (BNS) आणि पोक्सो (POCSO) कायद्यान्वये गुन्हा दाखल केला आहे. ही कारवाई २५ सप्टेंबर रोजी करण्यात आली असून परिसरात या घटनेमुळे खळबळ उडाली आहे.
शाळेत जाताना करायचा पाठलाग
पोलिसांनी दिलेल्या माहितीनुसार, निमगाव गुरु येथे राहणारी १५ वर्षीय अल्पवयीन मुलगी ही शिक्षण घेत आहे. ती नियमितपणे शाळेत जात असताना, आरोपी दशरथ सखाराम चित्ते हा तिचा कथितरीत्या चोरून पाठलाग करत होता. अनेक दिवसांपासून त्याचा हा त्रास सुरू होता.
‘उचलून नेण्याची’ दिली धमकी
घटनेच्या दिवशी संबंधित मुलगी शेतशिवारातील रस्त्याने जात असताना, आरोपी दशरथ चित्ते याने तिला अडवले. तिचा पाठलाग करत तो तिच्याजवळ आला आणि “तू माझ्यासोबत चल, नाहीतर तुला येथून उचलून नेईन,” अशी थेट धमकी दिली. या प्रकारामुळे प्रचंड घाबरलेल्या पीडित मुलीने घरी धाव घेत घडलेला सर्व प्रकार आपल्या पालकांना सांगितला.
घटनास्थळी पोलिसांची भेट; ‘ई-साक्ष’ नोंदवली
घटनेची माहिती मिळताच सहाय्यक पोलीस निरीक्षक (API) सविता कुवारे यांच्यासह पोलीस पथकाने तात्काळ निमगाव गुरु येथील घटनास्थळाला भेट देऊन पाहणी केली आणि आवश्यक ती कायदेशीर कार्यवाही पूर्ण केली. विशेष म्हणजे, या प्रकरणाचा तपास अधिक भक्कम करण्यासाठी पोलिसांनी तंत्रज्ञानाचा वापर करत ‘ई-साक्ष’ (E-Evidence) देखील नोंदवून घेतली आहे.
पोक्सोसह विविध कलमान्वये गुन्हा दाखल
पोलिसांनी घटनेचे गांभीर्य ओळखून पीडितेच्या फिर्यादीवरून आरोपी दशरथ सखाराम चित्ते याच्याविरुद्ध नवीन कायदे यंत्रणेनुसार भारतीय न्याय संहितेच्या (BNS) कलम ७८ (पाठलाग करणे), ३५१(२), ३५१(३) (गुन्हेगारी धमकी) तसेच बालकांचे लैंगिक अपराधांपासून संरक्षण अधिनियम (पोक्सो) कायद्याच्या कलम १२ अन्वये गुन्हा दाखल केला आहे.
या प्रकरणाचा पुढील तपास पोलीस उपनिरीक्षक (PSI) मोहोळकर करीत असून, पोलिसांकडून घटनेतील सर्व बाजूंची आणि तांत्रिक बाबींची कसून चौकशी करण्यात येत आहे. आरोपीचा शोध घेण्यासाठी पोलिसांचे पथक रवाना झाले आहे.
