तहसील गेटवर नागपूर कराराची होळी; स्वतंत्र विदर्भाच्या मागणीचा एल्गार
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा/सिंदखेडराजा : विदर्भाच्या विकासातील प्रश्नांकडे शासनाचे लक्ष वेधण्यासाठी सोमवारी तहसील कार्यालयाच्या गेटसमोर नागपूर कराराची होळी करण्यात आली. स्वतंत्र विदर्भ राज्याच्या मागणीसाठी झालेल्या या आंदोलनात सिंचन, शेती, उद्योग, रोजगार आणि प्रादेशिक विकासातील अनुशेषाच्या प्रश्नांवर कार्यकर्त्यांनी भूमिका मांडली.
२८ सप्टेंबर १९५३ रोजी झालेल्या नागपूर कराराचा संदर्भ देत आंदोलनकर्त्यांनी विदर्भाच्या विकासाशी संबंधित तरतुदींच्या अंमलबजावणीचा मुद्दा उपस्थित केला. विकास निधी, शासकीय नोकऱ्यांमधील प्रतिनिधित्व, मंत्रिमंडळातील स्थान तसेच तंत्रशिक्षणाच्या सुविधांबाबत करारात उल्लेख असल्याचे त्यांनी सांगितले.
या तरतुदींची अपेक्षित अंमलबजावणी झाली नसल्याचा आरोप करत स्वतंत्र विदर्भ राज्याची मागणी यावेळी करण्यात आली. विदर्भातील शेती व सिंचनाच्या प्रश्नांसोबतच उद्योग आणि रोजगाराच्या संधी वाढविण्याची गरज असल्याचे आंदोलनकर्त्यांनी नमूद केले.
दुपारी १२.४० वाजता झालेल्या या आंदोलनात शिवाजीराजे जाधव, डॉ. शिवाजी खरात, प्रा. दिलीप नाईकवाड, बद्री बुधवत, ॲड. रामेश्वर मेहेत्रे, म्हसाजी वाघ, कारभारी जायभाये, सुभाष विघ्ने, भगवान कुटे, नारायण बावणे, अतिश राजे जाधव यांच्यासह कार्यकर्ते सहभागी झाले होते.
नागपूर कराराची होळी करून स्वतंत्र विदर्भाच्या मागणीचा मुद्दा पुन्हा अधोरेखित करण्यात आला. विदर्भाच्या विकासाच्या प्रश्नावर शासनाने ठोस भूमिका घ्यावी, अशी मागणी आंदोलनकर्त्यांनी केली.
