मुक्ताईनगर पोलिसांकडून हरवलेल्या तीन व्यक्तींचा शोध सुरू ; नागरिकांना सहकार्याचे आवाहन
मुक्ताईनगर (प्रतिनिधी) : मुक्ताईनगर पोलीस स्टेशन हद्दीतील उचंदा परिसरातून विविध कालावधीत हरवलेल्या तीन व्यक्तींचा शोध मुक्ताईनगर पोलिसांकडून सुरू असून, संबंधित व्यक्तींविषयी कोणतीही माहिती मिळाल्यास तात्काळ पोलिसांशी संपर्क साधण्याचे आवाहन करण्यात आले आहे.याबाबत पोलिसांनी दिलेल्या माहितीनुसार, दिनांक 23 जुलै 2026 रोजी तक्रारदार नितीन राजेंद्र पाटील, रा. उचंदा, ता. मुक्ताईनगर यांनी दिलेल्या तक्रारीनुसार त्यांचे वडील राजेंद्र पंडित पाटील (वय 60) हे 22 जुलै 2024 रोजी दुपारी 12.30 ते 1 वाजेदरम्यान घरातून कोणालाही न सांगता निघून गेले. त्यांचा रंग सावळा, उंची सुमारे 5 फूट 5 इंच असून अंगात निळ्या रंगाचा फुल शर्ट, फुल पॅन्ट व पायात चप्पल होती. ते मानसिकदृष्ट्या अस्वस्थ असल्याचे तक्रारीत नमूद करण्यात आले आहे. याप्रकरणी मुक्ताईनगर पोलीस स्टेशन येथे मिसिंग तक्रार क्र. 40/2024 दाखल करण्यात आली आहे.तसेच, दिनांक 26 ऑक्टोबर 2023 रोजी सुवर्णा मधुकर इंगळे, रा. उचंदा यांनी त्यांचा मुलगा पंकज मधुकर इंगळे (वय 23) हरवल्याची तक्रार दाखल केली होती. पंकज हा 24 ऑक्टोबर 2023 रोजी दुपारी 11.30 ते 12.30 वाजेदरम्यान घरातून निघून गेला होता. त्याचा रंग सावळा, मोठे डोळे, सरळ नाक असून पाठीवर मोठा मस आहे. तो उजव्या पायाने लंगडत चालतो. अंगात पांढरा फुल टी-शर्ट व फुल पॅन्ट होती. याप्रकरणी मिसिंग तक्रार क्र. 65/2023 दाखल असून पोलिसांकडून त्याचा शोध सुरू आहे.याशिवाय, दिनांक 26 सप्टेंबर 2025 रोजी राधाबाई दत्तू सोनटक्के, रा. उचंदा यांनी त्यांचा मुलगा भगवान दत्तू सोनटक्के (वय 45) हरवल्याची तक्रार दिली आहे. भगवान सोनटक्के हे 13 सप्टेंबर 2025 रोजी दुपारी 12 वाजेच्या सुमारास घरातून कोणालाही न सांगता निघून गेले होते. त्यांचा रंग गोरा, लांब दाढी, पांढरी मिशी व डोक्यावरील केस पूर्ण पांढरे असून उंची 5 फूट 3 इंच आहे. अंगात आकाशी रंगाचा टी-शर्ट व फुल पॅन्ट होती. तेही मानसिकदृष्ट्या अस्वस्थ असल्याचे सांगण्यात आले आहे.हरवलेल्या तिन्ही व्यक्तींचा शोध घेण्यासाठी मुक्ताईनगर पोलिसांकडून विविध ठिकाणी शोधमोहीम राबविण्यात येत आहे. संबंधित व्यक्तींबाबत कोणाला माहिती मिळाल्यास मुक्ताईनगर पोलीस स्टेशनशी संपर्क साधावा, असे आवाहन पोलिस प्रशासनाने केले आहे. पोलीस निरीक्षक आशिष अडसूळ यांच्या मार्गदर्शनाखाली पुढील तपास सुरू आहे.
