मुक्ताईनगर । प्रतिनिधी ।
खमताने (ता. सटाणा, जि. नाशिक) येथे १० वर्षीय नाभिक समाजातील अल्पवयीन बालिकेवर ७० वर्षीय व्यक्तीने लैंगिक अत्याचार केल्याची धक्कादायक घटना उघडकीस आल्यानंतर संपूर्ण नाभिक समाजात तीव्र संतापाची लाट उसळली आहे. या अमानुष व मानवतेला काळीमा फासणाऱ्या घटनेचा मुक्ताईनगर तालुका नाभिक समाजाच्या वतीने तीव्र शब्दांत निषेध करण्यात आला आहे. याबाबत नाभिक समाजाने तहसीलदारांना निवेदन सादर केले.
निवेदनात म्हटले आहे की, खमताने (ता. सटाणा, जि. नाशिक) येथे १० वर्षीय नाभिक समाजातील
अल्पवयीन बालिकेवर ७० वर्षीय व्यक्तीने लैंगिक अत्याचार केला होता. या घटनेमुळे तीव्र संताप व्यक्त होत होता. या घटनेतील राक्षसी व हैवानी प्रवृत्तीच्या नराधमांना फाशीची शिक्षा देण्यात यावी, अशी मागणी निवेदनात करण्यात आली आहे. तसेच अल्पवयीन मुलींवरील अत्याचाराच्या घटना दिवसेंदिवस वाढत आहेत आणि कायद्याची भीती उरलेली नाही, ही अत्यंत गंभीर बाब आहे. समाजातील प्रत्येक घटकाने एकत्र येऊन अशा घटनांविरोधात आवाज उठवणे गरजेचे आहे. पीडित बालिकेला तात्काळ न्याय मिळावा, आरोपीवर जलदगती न्यायालयात खटला चालवून कठोर शिक्षा द्यावी, अशीही मागणी निवेदनाव्दारे करण्यात आली आहे.
