उमाळी गावात रक्ताच्या नात्याला काळिमा!मुलाकडून वडिलांचा कोयत्याने वार करून खून; मलकापूर तालुक्यात खळबळ

मलकापूर प्रतिनिधी |मलकापूर तालुक्यातील उमाळी येथे वडील आणि मुलाच्या नात्याला काळिमा फासणारी धक्कादायक घटना घडली आहे. १९ वर्षीय मुलाने आपल्या ५० वर्षीय वडिलांवर राहत्या घरी कोयत्याने वार करून त्यांची हत्या केल्याची प्राथमिक माहिती समोर आली आहे. गुरुवार, दि. १५ ऑक्टोबर २०२६ रोजी रात्री सुमारे ११ वाजताच्या सुमारास ही घटना घडली. या घटनेमुळे उमाळी गावासह परिसरात मोठी खळबळ उडाली आहे.नेमकी घटना काय?मिळालेल्या प्राथमिक माहितीनुसार, दीपक सोपान चव्हाण (वय १९, रा. उमाळी, ता. मलकापूर) याने आपले वडील सोपान नामदेव चव्हाण (वय ५०) यांच्यावर उमाळी येथील राहत्या घरी कोयत्याने वार केले. या हल्ल्यात सोपान चव्हाण यांचा मृत्यू झाल्याची माहिती आहे.घटनेची माहिती स्थानिक पोलिसांना मिळताच मलकापूर ग्रामीण पोलिसांनी घटनास्थळी धाव घेतली. मृतदेह उत्तरीय तपासणीसाठी रात्री १२ वाजून १० मिनिटांच्या सुमारास सामान्य रुग्णालय, मलकापूर येथे नेण्यात आला. उपलब्ध माहितीनुसार, बातमी लिहिण्याच्या वेळेपर्यंत मृतदेहाचे शवविच्छेदन झालेले नव्हते.वरिष्ठ पोलीस अधिकाऱ्यांची घटनास्थळी भेटघटनेचे गांभीर्य लक्षात घेऊन अप्पर पोलीस अधीक्षक, खामगाव, उपविभागीय पोलीस अधिकारी, मलकापूर तसेच मलकापूर ग्रामीण पोलीस ठाण्याच्या ठाणेदारांनी घटनास्थळी भेट देऊन परिस्थितीची पाहणी केली.घटनेनंतर गावातील परिस्थितीवर पोलिसांकडून लक्ष ठेवण्यात येत असून, गावात शांतता असल्याची माहिती मिळाली आहे.हत्येमागील कारण अद्याप अस्पष्टया घटनेमागील नेमके कारण काय, याबाबत अद्याप स्पष्ट माहिती समोर आलेली नाही. पोलिसांच्या तपासातूनच हत्येमागील कारण आणि घटनेशी संबंधित इतर बाबी स्पष्ट होणार आहेत.रक्ताच्या नात्यातील या धक्कादायक घटनेने उमाळी गाव हादरले असून, या प्रकरणाच्या पुढील तपासाकडे परिसरातील नागरिकांचे लक्ष लागले आहे.