आमदार मनोजभाऊ कायंदे यांच्या ‘नंदव्हिला’ निवासस्थानी जनता दरबार; नागरिकांच्या समस्यांवर तात्काळ कार्यवाहीचे आदेश!
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा:सिंदखेडराजा विधानसभा मतदारसंघाचे आमदार मनोजभाऊ कायंदे यांच्या देऊळगाव राजा येथील ‘नंदव्हिला’ निवासस्थानी आज, १४ सप्टेंबर २०२६ रोजी विशेष ‘जनता दरबार’ संपन्न झाला. या जनता दरबाराच्या माध्यमातून आमदार कायंदे यांनी मतदारसंघातील शेकडो नागरिकांशी थेट संवाद साधत त्यांच्या भेटीगाठी घेतल्या. यावेळी नागरिकांनी आपल्या विविध समस्या, वैयक्तिक अडचणी आणि परिसरातील विकासकामांबाबतच्या मागण्या मांडल्या.
जनता दरबारात आलेल्या प्रत्येक नागरिकाचे म्हणणे आमदार कायंदे यांनी अत्यंत शांतपणे आणि सविस्तरपणे ऐकून घेतले. नागरिकांच्या मूलभूत आणि प्रलंबित समस्या तातडीने मार्गी लागाव्यात, यासाठी त्यांनी उपस्थित व संबंधित शासकीय अधिकारी आणि प्रशासकीय विभागांशी जागेवरूनच संपर्क साधला. लोकांच्या अडचणींवर विनाविलंब आवश्यक ती कार्यवाही करण्याचे कडक निर्देश त्यांनी प्रशासनाला दिले.
“जनतेच्या प्रत्येक सुख-दुःखात आणि अडचणीच्या वेळी मी त्यांच्या पाठीशी खंबीरपणे उभा आहे. मतदारसंघातील जनतेच्या प्रश्नांची सोडवणूक करण्यासाठी मी सातत्याने आणि प्रामाणिकपणे प्रयत्नशील राहीन,” अशी ग्वाही आमदार मनोज कायंदे यांनी यावेळी दिली. ‘जनतेचा विश्वास, विकासाची जबाबदारी’ हेच आपले मुख्य ध्येय असल्याचे सांगत त्यांनी नागरिकांना आश्वस्त केले. या जनता दरबाराला मतदारसंघातील नागरिक, कार्यकर्ते आणि विविध विभागांचे पदाधिकारी मोठ्या संख्येने उपस्थित होते.
