विजय मनोहरराव घोडे आवाज न्यायाचा प्रतिनिधी स्टार भारत लाईव्ह एक्सप्रेस अकोला जिल्हादि. 2 ऑक्टोंबर 2026

तेल्हारा | अकोला जिल्ह्यातील तेल्हारा तालुक्यात BSNL च्या इंटरनेट सेवेबाबत ग्राहकांच्या तक्रारी दिवसेंदिवस वाढत आहेत. शहरातील विविध भागांमध्ये गेल्या दोन ते तीन महिन्यांपासून इंटरनेट सेवा सुरळीत मिळत नसल्याच्या तक्रारी ग्राहकांकडून करण्यात येत आहेत. विशेष म्हणजे, BSNL ग्राहक टॉवरपासून अवघ्या 50 ते 100 मीटर अंतरावर असतानाही ग्राहकांना खराब नेटवर्क आणि अत्यंत कमी दर्जाची इंटरनेट सेवा मिळत असल्याचा दावा ग्राहकांकडून करण्यात येत आहे.
BSNL कडून 4G सेवा सुरू करण्यात आली असली तरी अनेक ग्राहकांना प्रत्यक्षात वारंवार 2G नेटवर्कवर सेवा वापरावी लागत असल्याचे चित्र आहे. त्यामुळे इंटरनेटचा वापर करताना ग्राहकांना मोठ्या अडचणींचा सामना करावा लागत आहे. विशेषतः घरामध्ये नेटवर्कची समस्या अधिक जाणवत असून, इंटरनेट वापरण्यासाठी ग्राहकांना घराबाहेर पडावे लागत असल्याचे सांगण्यात येत आहे.
दोन-तीन महिन्यांपासून तक्रारी, तरीही समस्या कायम
तेल्हारा शहरातील ग्राहकांकडून मागील दोन ते तीन महिन्यांपासून BSNL च्या संबंधित विभागाकडे तोंडी तसेच भ्रमणध्वनीद्वारे नेटवर्क व इंटरनेट सेवेबाबत तक्रारी करण्यात येत असल्याचे सांगण्यात येते. या समस्येबाबत अकोला स्तरावरील संबंधित विभागालाही माहिती देण्यात आली. मात्र, अद्यापही परिस्थितीत अपेक्षित सुधारणा झालेली नसल्याची ग्राहकांची तक्रार आहे.
ग्राहकांच्या म्हणण्यानुसार, संबंधित कर्मचाऱ्यांकडून “तेल्हारा शहरात येण्यासाठी गाडी नाही”, “आज येतो”, “उद्या येतो” अशा प्रकारची उत्तरे मिळत असल्याने प्रत्यक्ष पाहणी व दुरुस्तीचे काम लांबत आहे. त्यामुळे ग्राहकांमध्ये नाराजी वाढत आहे.
महिला, विद्यार्थी, दिव्यांग व ज्येष्ठ नागरिकांची गैरसोय
घरामध्ये इंटरनेट सेवा उपलब्ध होत नसल्यामुळे महिला, विद्यार्थी, दिव्यांग व्यक्ती तसेच ज्येष्ठ नागरिकांना विशेष त्रास सहन करावा लागत आहे. ऑनलाइन शिक्षण, शासकीय कामे, डिजिटल व्यवहार, ऑनलाइन अर्ज तसेच दैनंदिन इंटरनेटच्या वापरासाठी ग्राहकांना घराबाहेर जाऊन नेटवर्क शोधावे लागत असल्याचे सांगण्यात येत आहे.
“BSNL ग्राहकांनी इंटरनेट सेवा वापरण्यासाठी उन्हाळा, पावसाळा आणि हिवाळा अशा तिन्ही ऋतूंमध्ये घराबाहेर पडूनच इंटरनेटचा वापर करायचा का?” असा सवाल संतप्त ग्राहकांकडून उपस्थित केला जात आहे.
BSNL ग्राहक सेवा केंद्राशी संपर्काचा प्रश्न
नेटवर्कच्या समस्येबरोबरच 1503/18001801503 या BSNL ग्राहक सेवा केंद्राशी संपर्क साधताना देखील अडचणी येत असल्याची तक्रार ग्राहकांकडून करण्यात येत आहे. त्यामुळे समस्या नेमकी कुठे नोंदवायची आणि तिचे निराकरण कधी होणार, असा प्रश्न ग्राहकांसमोर निर्माण झाला आहे.
वरिष्ठ अधिकारी व लोकप्रतिनिधींनी तातडीने दखल घ्यावी
तेल्हारा तालुक्यातील विविध भागांमध्ये निर्माण झालेल्या नेटवर्क व इंटरनेट सेवेच्या समस्येची BSNL च्या वरिष्ठ अधिकाऱ्यांनी तातडीने दखल घेऊन प्रत्यक्ष पाहणी करावी, तसेच आवश्यक तांत्रिक उपाययोजना करून सेवा सुरळीत करावी, अशी मागणी ग्राहकांकडून होत आहे.
याशिवाय स्थानिक लोकप्रतिनिधींनीही या प्रश्नात लक्ष घालून संबंधित BSNL अधिकाऱ्यांकडे ग्राहकांची समस्या मांडावी, अशी अपेक्षा व्यक्त केली जात आहे. ग्राहकांकडून नियमित शुल्क आकारले जात असताना त्यांना अपेक्षित दर्जाची सेवा मिळणे आवश्यक आहे, अशी भावना तेल्हारा शहरासह तालुक्यातील BSNL ग्राहकांमध्ये व्यक्त होत आहे.
आता तरी BSNL प्रशासन या समस्येकडे गांभीर्याने पाहून ग्राहकांना सुरळीत 4G इंटरनेट सेवा उपलब्ध करून देणार का, याकडे ग्राहकांचे लक्ष लागले आहे.