नळजोडणीसाठी खोदलेले रस्ते दर्जेदार पद्धतीने पूर्ववत करा; नगरसेविका वैशाली पाटील यांची मागणी

नळजोडणीसाठी खोदलेले रस्ते दर्जेदार पद्धतीने पूर्ववत करा; नगरसेविका वैशाली पाटील यांची मागणी

मनपा आयुक्तांना निवेदन; प्रभाग क्रमांक १३ मधील रस्ता कटिंगची संयुक्त पाहणी करून १५ दिवसांत अहवाल सादर करण्याची मागणी

जळगाव : शहरातील नागरिकांना नवीन नळजोडणी देताना करण्यात येणारी रस्ता खोदाई आणि त्यानंतरची रस्त्यांची दुरुस्ती हा प्रश्न पुन्हा ऐरणीवर आला आहे. नळजोडणीसाठी नागरिकांकडून नियमानुसार शुल्क आकारले जाते; मात्र खोदाईनंतर रस्ते पूर्ववत करताना अनेक ठिकाणी अपेक्षित दर्जा राखला जात नसल्याची बाब समोर येत असल्याने नागरिकांच्या सुरक्षिततेचा आणि सार्वजनिक रस्त्यांच्या गुणवत्तेचा प्रश्न निर्माण झाला आहे.

या पार्श्वभूमीवर प्रभाग क्रमांक १३ मधील नळजोडणीसाठी खोदण्यात आलेले रस्ते शास्त्रोक्त, सुरक्षित आणि टिकाऊ पद्धतीने पूर्ववत करावेत, अशी मागणी नगरसेविका वैशाली अमित पाटील यांनी केली आहे. यासंदर्भात त्यांनी महानगरपालिका आयुक्तांना निवेदन सादर केले असून, संबंधित रस्ता कटिंगची प्रत्यक्ष पाहणी करून आवश्यक ती कार्यवाही करण्याची मागणी केली आहे.

प्रभाग क्रमांक १३ मधील महाबळ कॉलनी, संभाजीनगर, आदर्श नगर, संत गाडगेबाबा चौक, नेहरू नगर, मोहन नगर, रायसोनी नगर, महाडी रोड यासह विविध भागांमध्ये नळजोडणीसाठी करण्यात आलेल्या रस्ता खोदाईची संयुक्त पाहणी करण्यात यावी, अशी मागणी निवेदनातून करण्यात आली आहे.

प्रत्येक रस्ता कटिंगची स्वतंत्र नोंद ठेवण्याची मागणी

नळजोडणीसाठी नागरिकांकडून शुल्क घेतले जात असल्याने खोदाईनंतर रस्ता पूर्वस्थितीत आणण्याची जबाबदारी संबंधित यंत्रणेवर निश्चित करणे आवश्यक असल्याचे वैशाली पाटील यांनी निवेदनात नमूद केले आहे. त्यासाठी प्रत्येक रस्ता कटिंगच्या ठिकाणाची प्रत्यक्ष पाहणी करून त्याची स्वतंत्र नोंद ठेवण्याची मागणी करण्यात आली आहे.

या नोंदीमध्ये नळजोडणी क्रमांक, खोदाईचे ठिकाण, नागरिकांकडून आकारण्यात आलेले शुल्क, रस्त्याचा प्रकार आणि दुरुस्तीसाठी करण्यात आलेली कार्यवाही यांचा सविस्तर तपशील नोंदवावा, अशी मागणी करण्यात आली आहे.

वरवरची डागडुजी नको; टिकाऊ दुरुस्तीची अपेक्षा

डांबरी तसेच काँक्रिटीकरण केलेल्या रस्त्यांची दुरुस्ती करताना त्या रस्त्याच्या मूळ स्वरूपानुसारच काम करण्यात यावे. केवळ वरवरची डागडुजी न करता रस्ता समतल, सुरक्षित आणि दीर्घकाळ टिकणाऱ्या दर्जाने पूर्ववत करण्यात यावा, अशी अपेक्षा नगरसेविका वैशाली पाटील यांनी व्यक्त केली आहे.

प्रभाग क्रमांक १३ मधील सर्व संबंधित ठिकाणांची पाहणी करून ज्या ठिकाणी रस्ते पूर्ववत करण्याची आवश्यकता आहे, तेथे तातडीने कार्यवाही करावी. तसेच करण्यात आलेल्या कार्यवाहीचा लेखी अहवाल १५ दिवसांच्या आत सादर करावा, अशी मागणी त्यांनी मनपा आयुक्तांकडे केली आहे.

नळजोडणी ही नागरिकांच्या मूलभूत गरजेशी संबंधित असली, तरी त्यासाठी सार्वजनिक रस्त्यांची होणारी खोदाई आणि त्यानंतरची दुरुस्तीही नियोजनबद्ध व दर्जेदार पद्धतीने होणे आवश्यक आहे. रस्ते पूर्ववत करण्याच्या कामात संबंधित विभागाची जबाबदारी निश्चित झाल्यास सार्वजनिक निधीचा योग्य वापर होण्यासोबतच नागरिकांना होणारा त्रासही कमी होऊ शकतो. त्यामुळे महानगरपालिका प्रशासन या निवेदनाची दखल घेऊन प्रत्यक्ष पाहणी व आवश्यक दुरुस्तीबाबत काय कार्यवाही करते, याकडे प्रभागातील नागरिकांचे लक्ष लागले आहे.