पावसाने पाठ फिरवली, पिके करपण्याच्या मार्गावर; शेतकऱ्यांच्या मदतीसाठी चिखली तालुका काँग्रेसचे तहसीलदारांना निवेदन

प्रतिनिधी : अरुणा दत्तात्रय खंडागळे

चिखली : गेल्या जवळपास महिनाभरापासून पावसाने दडी मारल्याने चिखली तालुक्यातील खरीप हंगामातील पिकांवर संकटाचे सावट निर्माण झाले आहे. पावसाच्या प्रतीक्षेत असलेली उभी पिके पाण्याअभावी करपण्याच्या अवस्थेत असल्याचा दावा चिखली तालुका काँग्रेसने केला आहे. या पार्श्वभूमीवर चिखली तालुका दुष्काळग्रस्त जाहीर करावा, तसेच तालुक्यातील पिकांचे तातडीने पंचनामे करून शासनाकडे प्रस्ताव पाठवावा, अशी मागणी काँग्रेसच्या वतीने करण्यात आली आहे. याबाबत बुधवार, १६ सप्टेंबर रोजी तहसीलदारांना निवेदन देण्यात आले. तालुका काँग्रेसचे अध्यक्ष रामभाऊ जाधव यांच्या नेतृत्वाखाली प्रशासनाला हे निवेदन देण्यात आले. शेतकऱ्यांनी कर्ज काढून मोठ्या अपेक्षेने खरीप पिकांची पेरणी केली. सुरुवातीच्या पावसामुळे पिकांची उगवण चांगली झाली आणि यंदा उत्पादन समाधानकारक मिळेल, अशी आशा निर्माण झाली होती. मात्र त्यानंतर पावसाने दीर्घकाळ दडी मारल्याने पिकांना आवश्यक ओलावा मिळत नसल्याचे काँग्रेसने निवेदनात नमूद केले आहे.पिकांसोबत शेतकऱ्यांच्या आशेलाही तडाशेतात उभी असलेली पिके वाचविण्यासाठी पावसाची प्रतीक्षा करणाऱ्या शेतकऱ्यांसमोर आता आर्थिक संकट अधिक गडद होत आहे. पिके वाचतील का? घेतलेले कर्ज कसे फेडायचे? कुटुंबाचा उदरनिर्वाह कसा करायचा? असे प्रश्न शेतकऱ्यांसमोर निर्माण झाल्याचे काँग्रेसने म्हटले आहे.ही परिस्थिती केवळ पिकांच्या नुकसानीपुरती मर्यादित नसून शेतकऱ्यांच्या वर्षभराच्या मेहनतीवर आणि आर्थिक नियोजनावर परिणाम करणारी आहे. त्यामुळे प्रशासनाने केवळ कागदोपत्री आढावा न घेता प्रत्यक्ष शेतपातळीवर परिस्थितीची पाहणी करणे आवश्यक असल्याचा मुद्दा निवेदनातून पुढे आला आहे.पंचनामे करून वस्तुनिष्ठ अहवालाची मागणीचिखली तालुक्यातील सर्व गावांमध्ये पिकांची प्रत्यक्ष पाहणी करून तातडीने पंचनामे करावेत, उपलब्ध पर्जन्यमानाची नोंद घ्यावी आणि पिकांच्या नुकसानीचा वस्तुनिष्ठ आढावा घ्यावा, अशी मागणी काँग्रेसने केली आहे.या पाहणीच्या आधारे चिखली तालुका दुष्काळग्रस्त घोषित करण्यासाठी शासनाकडे तातडीने प्रस्ताव पाठवावा, अशीही मागणी करण्यात आली आहे. तसेच पात्र शेतकऱ्यांना शासनाच्या नियमानुसार दुष्काळी सवलती, पीक नुकसानभरपाई, पीकविमा आणि आवश्यक मदत उपलब्ध करून देण्याची मागणी करण्यात आली आहे.चिखली तालुक्यात पावसाची स्थिती आणि पिकांचे नुकसान याबाबत प्रशासनाकडून होणारा प्रत्यक्ष सर्वेक्षण अहवाल या मागणीच्या पुढील प्रक्रियेसाठी महत्त्वाचा ठरणार आहे. यापूर्वीही चिखली तालुक्यात पीक परिस्थिती आणि पर्जन्यमानाच्या आधारे दुष्काळसदृश परिस्थितीबाबत चर्चा झालेली आहे. �Marathi News Esakalप्रशासनाच्या पाहणीकडे शेतकऱ्यांचे लक्षतालुका काँग्रेसने उपस्थित केलेला मुख्य प्रश्न म्हणजे पिकांचे तातडीने पंचनामे करून शासनस्तरावर प्रस्ताव पाठविला जाणार का? हा आहे. पावसाची प्रतीक्षा कायम असताना प्रशासनाच्या पाहणीला विलंब झाल्यास नुकसानीचे वस्तुनिष्ठ मूल्यांकन करण्यास अडचणी निर्माण होऊ शकतात. त्यामुळे तातडीने पाहणी, पंचनामे आणि अहवालाची प्रक्रिया सुरू करण्याची मागणी करण्यात आली आहे.या वेळी तालुका काँग्रेस कमिटीचे अध्यक्ष रामभाऊ जाधव, माजी अशोकराव पडघान, कृषीमित्र सचिन बोंद्रे, खरेदी-विक्रीचे अध्यक्ष ईश्वरराव इंगळे, युवक काँग्रेसचे तालुका अध्यक्ष अंबादास वाघमारे, चिखली तालुका किसान काँग्रेसचे अध्यक्ष समाधान आकाळ, तालुका सेवादल अध्यक्ष रामभाऊ भुसारी, तालुका पंचायत राज समिती अध्यक्ष गणेश जवंजाळ, शिवराज पाटील, समाधान गिते, शेषराव पाटील आंभोरे, परमेश्वर साळवे, अंजाबराव देशमुख, संजय गिरी, भारत खासभागे, नितीन वाघ, सुनील करंडे, गजानन जाधव, गजानन डुकरे यांच्यासह कार्यकर्ते उपस्थित होते.