देऊळगाव राजा शहरात महिलांची भव्य कावड यात्रा; ‘हर हर महादेव’च्या जयघोषाने अवघे शहर भक्तीरसात न्हाले
स्टार भारत लाईव्ह एक्सप्रेस
प्रतिनिधी – शंकर शिवरकर
देऊळगाव राजा :पवित्र श्रावण महिन्यातील तिसऱ्या सोमवारचे औचित्य साधून देऊळगाव राजा शहरात महिलांच्या वतीने एका भव्य आणि नयनरम्य कावड यात्रेचे आयोजन करण्यात आले होते. अत्यंत उत्साही, शिस्तबद्ध आणि भक्तीमय वातावरणात ही कावड यात्रा आज मोठ्या थाटात संपन्न झाली. या यात्रेत शहरातील शेकडो महिला भाविकांनी उस्फूर्तपणे सहभाग घेतला होता.
नदीपात्रातून आणले जल; नर्मदेश्वर महादेवाला अभिषेक
आज सकाळी शहरातील सावखेड भोई वेश येथील जागृत हनुमान मंदिर आणि मानसिंग पुरा भागातील जागृत नर्मदेश्वर महादेव मंदिर परिसरातून या कावड यात्रेला विधीवत प्रारंभ झाला. येथील शेकडो महिलांनी डोक्यावर कलश आणि कावड घेऊन सावखेड भोई वेश ते आमना नदी पात्रापर्यंत पायी प्रवास केला. आमना नदीच्या पवित्र पात्रातून महिलांनी अत्यंत श्रद्धेने जल भरून घेतले.
शहरात भक्तीचा पूर; जयघोषाने परिसर दुमदुमला
नदीवरून जल घेऊन ही कावड यात्रा पुन्हा शहरात दाखल झाली. पारंपरिक वेशभूषेत आणि हातात कावड घेतलेल्या महिलांचा उत्साह पाहण्यासारखा होता. संपूर्ण मार्गावर ‘हर हर महादेव’, ‘बम बम भोले’ आणि महादेवाचा जयघोष करण्यात येत होता. या जयघोषाने आणि भक्तीगीतांनी अवघे देऊळगाव राजा शहर दुमदुमून गेले होते.
अभिषेकाने झाली सांगता
कावड यात्रा मुख्य मार्गावरून मार्गक्रमण करत मानसिंग पुरा येथील जागृत नर्मदेश्वर महादेव मंदिरात पोहोचली. येथे आणलेल्या पवित्र जलाने जागृत नर्मदेश्वर महादेवाच्या पिंडीवर सामूहिक जलाभिषेक करण्यात आला. या धार्मिक विधीनंतर महाआरती आणि प्रसादाचे वाटप करण्यात आले.
श्रावण महिन्यातील तिसऱ्या सोमवारी महिलांनी एकत्र येत काढलेली ही कावड यात्रा शहरात मोठी आकर्षणाची केंद्रबिंदू ठरली होती. यात्रा यशस्वी करण्यासाठी परिसरातील नागरिक आणि महिला मंडळाच्या सदस्यांनी मोलाचे सहकार्य केले.
