अंढेरा-मेरा-साखरखेर्डा सह इतर गावांना जोडणाऱ्या रस्त्याची दयनीय अवस्था; लोकप्रतिनिधींची उदासीनता

स्टार भारत लाईव्ह एक्सप्रेस

प्रतिनिधी – शंकर शिवरकर

नेते, सामाजिक संघटना आणि जनता गप्प; रस्त्याचे काम कधी होणार? प्रश्न कायम अनुत्तरित…

अंढेरा–मेरा–साखरखेर्डा तसेच परिसरातील अनेक गावांना जोडणाऱ्या प्रमुख रस्त्याची अवस्था दिवसेंदिवस अधिकच दयनीय होत चालली आहे. रस्त्यावर ठिकठिकाणी मोठे खड्डे पडले असून अनेक ठिकाणी डांबरीकरण पूर्णपणे उखडले आहे. त्यामुळे वाहनचालक, विद्यार्थी, शेतकरी आणि सर्वसामान्य नागरिकांना रोजच जीव धोक्यात घालून प्रवास करावा लागत आहे.
पावसाळ्यामुळे या खड्ड्यांमध्ये पाणी साचत असल्याने रस्त्याची खरी स्थिती लक्षात येत नाही. परिणामी दुचाकीस्वार घसरून अपघात होण्याच्या घटनांमध्ये वाढ होण्याची शक्यता निर्माण झाली आहे. तसेच रुग्णवाहिका, शालेय वाहने आणि मालवाहतूक करणाऱ्या वाहनांनाही मोठा त्रास सहन करावा लागत आहे.
स्थानिक नागरिकांनी अनेक वेळा संबंधित विभाग आणि लोकप्रतिनिधींकडे रस्त्याच्या दुरुस्तीची मागणी केली असल्याचे सांगितले जाते. मात्र अद्याप कोणतीही ठोस कार्यवाही झालेली नाही. त्यामुळे लोकप्रतिनिधींच्या कार्यपद्धतीबाबत नागरिकांमध्ये तीव्र नाराजी व्यक्त होत आहे.
विशेष म्हणजे, विविध सामाजिक प्रश्नांवर भूमिका घेणाऱ्या सामाजिक संघटना, राजकीय पदाधिकारी आणि संबंधित यंत्रणा याबाबत मौन बाळगून असल्याची चर्चा परिसरात सुरू आहे. त्यामुळे नागरिकांचा प्रश्न अधिकच गंभीर बनला आहे.
या रस्त्याचे तातडीने सर्वेक्षण करून दर्जेदार दुरुस्ती अथवा नव्याने बांधकाम करण्यात यावे, अशी मागणी परिसरातील नागरिकांकडून होत आहे. अन्यथा भविष्यात मोठी दुर्घटना घडल्यास त्याची जबाबदारी नेमकी कोणाची, असा सवालही उपस्थित केला जात आहे.
रस्त्याचे काम नेमके कधी सुरू होणार?
याकडे आता अंढेरा, मेरा, साखरखेर्डा आणि परिसरातील ग्रामस्थांचे लक्ष लागले असून, प्रशासन आणि लोकप्रतिनिधी यावर तातडीने निर्णय घेणार का, हे पाहणे महत्त्वाचे ठरणार आहे.