मेळसांगावे ग्रामपंचायतीच्या दुर्लक्षाविरोधात मनसे शेतकरी सेनेचा इशारा; पावसाळी कामे तातडीने करण्याची मागणी
गटारी, स्वच्छता व पाणीपुरवठ्याकडे दुर्लक्ष; अन्यथा ‘मनसे स्टाईल’ आंदोलनाचा इशारा
मुक्ताईनगर, प्रतिनिधी :
मुक्ताईनगर तालुक्यातील मेळसांगावे गावातील ग्रामपंचायत प्रशासनाने पावसाळ्यापूर्वी करावयाच्या आवश्यक विकास व स्वच्छता कामांकडे दुर्लक्ष केल्याचा आरोप महाराष्ट्र नवनिर्माण शेतकरी सेनेचे तालुकाध्यक्ष विनोद पाटील यांनी केला आहे. यासंदर्भात त्यांनी ग्रामपंचायत कर्मचाऱ्यांना वारंवार सूचना करूनही कोणतीही ठोस कार्यवाही करण्यात आली नसल्याचे सांगितले.
तालुक्यातील सर्व ग्रामपंचायतींना वैद्यकीय अधिकाऱ्यांकडून पावसाळ्यापूर्वी करावयाच्या प्रतिबंधात्मक उपाययोजनांबाबत मार्गदर्शक पत्र देण्यात आले होते. या पत्रामध्ये गावातील गटारींची स्वच्छता, साचलेल्या पाण्याच्या डबक्यांचे निर्मूलन, डासांची उत्पत्ती रोखण्यासाठी उपाययोजना, पिण्याच्या पाण्याचे निर्जंतुकीकरण तसेच पाणीपुरवठा यंत्रणेची नियमित देखभाल करण्याच्या सूचना देण्यात आल्या होत्या. मात्र, मेळसांगावे ग्रामपंचायतीकडून या सूचनांकडे दुर्लक्ष झाल्याचा आरोप करण्यात येत आहे.
पावसाळा सुरू झाल्यानंतर गावातील अनेक ठिकाणी पाणी साचून डबकी तयार झाली असून त्यामुळे डासांची वाढ होण्यास पोषक वातावरण निर्माण झाले आहे. परिणामी डेंग्यू, मलेरिया आणि इतर साथीच्या आजारांचा धोका वाढण्याची शक्यता व्यक्त केली जात आहे. तसेच गावातील काही भागांमध्ये गटारींची साफसफाई न झाल्याने नागरिकांना स्वतः पुढाकार घेऊन स्वच्छता करावी लागत असल्याची खंत ग्रामस्थांनी व्यक्त केली आहे.
याशिवाय पिण्याच्या पाण्यात आवश्यक ते निर्जंतुकीकरण न केल्यास जलजन्य आजार पसरण्याची भीती असून पाईपलाईन व व्हॉल्व्हची दुरुस्ती तातडीने करण्यात यावी, अशी मागणीही करण्यात आली आहे.
दरम्यान, ग्रामपंचायतीने तात्काळ आवश्यक उपाययोजना करून गावातील स्वच्छता व आरोग्यविषयक कामे हाती घ्यावीत, अन्यथा महाराष्ट्र नवनिर्माण शेतकरी सेनेच्या वतीने तीव्र आंदोलन छेडण्यात येईल, असा इशारा तालुकाध्यक्ष विनोद पाटील यांनी दिला आहे. गावकऱ्यांच्या आरोग्याशी संबंधित प्रश्नांबाबत कोणतीही तडजोड केली जाणार नसून प्रशासनाने याकडे गांभीर्याने लक्ष द्यावे, अशी मागणी त्यांनी केली.
